Моладзь Кіраўшчыны выбірае здаровы лад жыцця
Напрыканцы красавіка ў Кіраўску праходзіў традыцыйны велапрабег па вуліцах райцэнтра пад назвай “Моладзь — за здароўем на веласіпедзе!”. Падчас яго юным веласіпедыстам — выхаванцам СДЮШАР — быў перададзены сімвал роднага краю ў выглядзе драўлянага васілька. Рабяты правязуць яго па населеных пунктах раёна ў межах раённай міжведамаснай акцыі “Спазнай сваю малую радзіму”, якая праходзіць у Год малой радзімы. Акрамя прапаганды здаровага ладу жыцця, прадстаўнікі моладзі падчас такіх велазаездаў заклікаюць усіх далучацца да навядзення парадку на зямлі і добраўпарадкавання малых і вялікіх вёсак, аграгарадкоў.
Пасля Кіраўска акцыя прадоўжылася ў Мышкавічах. Яе ўдзельнікі, а гэта ў асноўным прадстаўнікі мясцовай моладзі, сабраліся на пляцоўцы перад Мышкавіцкім СДК. Адкрылася мерапрыемства флэшмобам, які падрыхтавалі вучні мясцовай школы. Удзельнікаў шчыра віталі ганаровыя госці: старшыня Мышкавіцкага сельскага Савета дэпутатаў Жанна Камінская, нязменны арганізатар Мемарыялу Героя Савецкага Саюза, Героя Сацыялістычнай Працы К.П. Арлоўскага, майстар спорту СССР, суддзя вышэйшай нацыянальнай катэгорыі, ветэран веласіпеднага спорту Уладзімір Бяляўскі, старшы інспектар АДАІ РАУС Віталь Котаў.
Усе разам — удзельнікі акцыі і госці — прынялі ўдзел у пасадцы дрэва Дружбы каля Дома культуры, прымеркаванай да Года малой радзімы.
Затым у падтрымку здаровага ладу жыцця ў суправаджэнні аўтамашыны дзяржаўтаінспекцыі адбыўся непасрэдна велапрабег па вуліцах аграгарадка.
Мерапрыемства завяршылася перадачай эстафеты Любоніцкаму сельскаму Дому культуры. Акцыя “Моладзь — за здароўем на веласіпедзе!” прадоўжыцца ў Любонічах.
Аляксандр ХАХЛОЎ.
Фота аўтара.