Кіраўскія юныя велагоншчыкі заваявалі ўпэўненыя перамогі на абласным узроўні
На базе нашага раёна прайшло першынство Магілёўскай вобласці па веласіпедным спорце на шашы памяці Уладзіміра Хухракова ў праграме алімпійскіх дзён моладзі сярод юніёраў і юніёрак 2000 года нараджэння і маладзей, а таксама спартакіяда дзіцяча-юнацкіх спартыўных школ Магілёўшчыны па веласпорце на шашы сярод юнакоў і дзяўчат 2002-2003 гадоў нараджэння і маладзей. Зноў каманда Кіраўскай СДЮШАР даказала, што на бягучы момант сярод аднатыпных устаноў вобласці ў веласпорце ёй няма роўных! Аб тым, як праходзілі спаборніцтвы, мы папрасілі расказаць дырэктара СДЮШАР Сяргея Клімовіча:
— Урачыстае адкрыццё спаборніцтваў адбылося на вучэбна-спартыўнай базе “Барсукі”. Удзельнікаў, а іх сабралася каля 50, вітаў галоўны суддзя, суддзя вышэйшай нацыянальнай катэгорыі Уладзімір Бяляўскі, які пажадаў спартсменам удалых стартаў і фінішаў. Пад гукі дзяржаўнага гімна Рэспублікі Беларусь капітаны каманд узнялі дзяржаўны флаг нашай краіны. Дырэктар СДЮШАР Сяргей Клімовіч пазнаёміў юных велагоншчыкаў з праграмай спаборніцтваў.
У першы дзень для ўдзельнікаў алімпійскіх дзён моладзі прайшла індывідуальная гонка з раздзельнага старта на 10-кіламятровай дыстанцыі. У саставы каманд былі ўключаны па 6 юнакоў і па 4 дзяўчыны.
Кіраўчанкам ніхто не змог скласці канкурэнцыю — за прызавыя месцы яны змагаліся па-сутнасці паміж сабой. У выніку пераможцай стала ўдзельніца нядаўняга Мемарыялу К.П.Арлоўскага Ганна Васількова. Другі і трэці рэзультат адпаведна паказалі Вікторыя Рудакова і Ангеліна Шчарбакова. У першай чацвёрцы таксама была Марыя Зайцава.
У юнакоў першыя 2 месцы заваявалі прадстаўнікі Магілёва, а вось трэці радок у выніковым пратаколе заняў Максім Лёгкі з нашай каманды. Заліковыя ачкі ў скарбонку каманды прынеслі таксама Яраслаў Грудзінін, Арцём Несцярэнка, Мікіта Русецкі.
На наступны дзень прайшлі групавыя гонкі з агульнага старта. Дзяўчаты пераадольвалі дыстанцыю ў 27 км. І зноў першыя 4 месцы разыгралі паміж сабой прадстаўніцы аддзялення веласпорту Кіраўскай СДЮШАР. Перамогу зноў святкавала Ганна Васількова. А вось на астатніх трох радках адбылася ракіроўка: другі вынік паказала Ангеліна Шчарбакова, трэці — Марыя Зайцава, чацвёрты — Вікторыя Рудакова.
У юнакоў, якія імчаліся па 45-кіламятровай дыстанцыі “серабро” заваяваў Арцём Несцярэнка. Максім Лёгкі прынёс камандзе заліковыя балы.
Па суме двух дзён з вялікім адрывам камандную перамогу на сваёй малой радзіме заваявалі велагоншчыкі Кіраўскай СДЮШАР, якія набралі 227 ачкоў. На другім месцы — Магілёўская абласная СДЮШАР №1 (137), Магілёўская гарадская СДЮШАР (111), Бабруйская СДЮШАР (81).
Шэраг нашых рабят і дзяўчат, якія вызначыліся ў гонках алімпійскіх дзён моладзі, разам з іншымі прынялі ўдзел і ў спартакіядзе ДЮСШ Магілёўскай вобласці, паколькі падыходзілі па ўзросце (у гонках АДМ яны былі маладзей за сваіх апанентаў і, тым не менш, сталі пераможцамі і прызёрамі!).
У 10-кіламятровай гонцы з раздзельнага старта перамоау на рахунку Вікторыі Рудаковай. Другое месца — у Ангеліны Шчарбаковай. А вось трэцяй у гонцы стала Паліна Конрад, якая на 2-3 гады маладзей за сваіх саперніц!
У групавой гонцы з агульнага старта п’едэстал гонару выглядаў наступным чынам: Ангеліна Шчарбакова, Марыя Зайцава, Вікторыя Рудакова. Чацвёрты вынік паказала Паліна Конрад.
Сярод юнакоў у абедзьвюх гонках у лік прызёраў трапіў Максім Лёгкі: у “індывідуалцы” ён быў другім, у групавой гонцы — трэцім.
Па суме дзвюх дзён зноў упэўненую перамогу святкавалі кіраўскія СДЮШАРаўцы, набраўшы 215 ачкоў. Далей каманды рамеркаваліся наступным чынам: Магілёўская абласная СДЮШАР №1 (164), Бабруйская СДЮШАР (94), Магілёўская гарадская СДЮШАР (86).
Пераможцы і прызёры былі ўзнагароджаны дыпломамі і медалямі адпаведных ступеней, а каманда-пераможца — яшчэ і кубкамі.
Зараз наша каманда рыхтуецца да больш важных стартаў: з 15 па 18 жніўня ў Магілёве пройдзе рэспубліканская спартакіяда ДЮСШ з удзелам усіх спартыўных школ краіны, дзе культывуецца веласіпедны спорт. Летась кіраўчане аказаліся ў кроку ад п’едэстала гонару, заняўшы 4-е месца. Надышоў час штурмаваць вяршыні!..
Запісаў Аляксандр ХАХЛОЎ.