Спартыўныя спаборніцтвы ў Дзень Незалежнасці прайшлі ў Кіраўску

Па традыцыі святкаванне Дня Незалежнасці ў Кіраўску не абышлося без спартыўных спаборніцтваў, якія праходзілі яны на стадыёне СДЮШАР. У праграму ўвайшлі віды, якія найбольш даступныя і  даўно палюбіліся прыхільнікам здаровага ладу жыцця: міні-футбол, шашкі, шахматы, дартс, армрэстлінг, скачкі са скакалкай.

На міні-футбольнай пляцоўцы са штучным пакрыццём была арганізавана таварыская сустрэча паміж футбалістамі з Барсукоў і Мышкавіч. Перамогу святкавала барсукоўская каманда.

Самымі трапнымі і ўдачлівымі ў спаборніцтвах па дартсе аказаліся Канстанцін Гарбачоў і Вольга Пішчаліна.

Найбольш дужым быў Сяргей Іваніцкі, які падняў гіру найбольшую колькасць разоў.

Усяго адзін пункт вырашыў лёс першага  і другога месцаў ў скачках са скакалкай: Улад Абраменка з рэзультатам 168 разоў за мінуту абышоў свайго таварыша Дзмітрыя Гушчына.

У спаборніцтвах па шашках і шахматах сярод дзяцей і падлеткаў пераможцамі сталі адпаведна Аляксей Бодык і Самір Ахундаў. Сярод дарослых лепшым шашыстам стаў Аляксандр Ласякоў.