Узнагароды за добрасумленную працу і ў сувязі з юбілеем
З прыемнага моманту пачалася пленарная частка выязнога сумеснага пасяджэння прэзідыума раённага Савета дэпутатаў і райвыканкама, якое праходзіла на базе Дабаснянскага сельскага Савета: ушанавання з нагоды 50-гадовага юбілею начальніка Кіраўскай раённай энергаінспекцыі Бабруйскага аддзялення філіяла “Энерганагляд” Магілёўскага РУП “Магілёўэнерга” Мікалая Русецкага. Першы намеснік старшыні райвыканкама — начальнік упраўлення па сельскай гаспадарцы і харчаванні Аляксандр Сухадольскі ўручыў яму Падзячнае пісьмо раённага выканаўчага камітэта за шматгадовую добрасумленную працу, высокі прафесіяналізм, узорнае выкананне працоўных абавязкаў, старшыня раённага Савета дэпутатаў Галіна Слабоднікава — Ганаровую грамату райсавета дэпутатаў. Яны выказалі юбіляру словы віншаванняў і шчырах пажаданняў.
Н.П.Русецкі — ураджэнец нашага раёна, нарадзіўся ў в.Гарадзец. Скончыў Бабруйскі механіка-тэхналагічны тэхнікум, Калінінградскае ваенна-інжынернае вучылішча інжынерных войск па спецыяльнасці “электратэхнічныя сродкі і энергазабеспячэнне”. Служыў у Беларускай ваеннай акрузе ў г.Бабруйску.
З 1992 года працаваў у родным раёне — галоўным энергетыкам у СВК “Калгас Чапаева”, затым — старшынёй названай гаспадаркі, пазней — энергетыкам у Кіраўскай ПМК-255.
З 2006 года прафесійная дзейнасць Мікалая Пятровіча звязана з энергаінспекцыяй Кіраўскага раёна Бабруйскага міжраённага аддзялення філіяла “Энерганагляд”, дзе працаваў спачатку інспектарам, а ў 2009 узначаліў калектыў.
Калегі па рабоце, кіраўнікі арганізацый і ўстаноў раёна ведаюць М.П.Русецкага як высокакваліфікаванага спецыяліста, адказнага і добрасумленнага чалавека. Варта адзначыць, што Кіраўская энергаінспекцыя па вытворчых паказчыках лічыцца адной з лепшых у Магілёўскай вобласці.