У Кіраўску прайшла традыцыйная сустрэча з прызыўнікамі
У РДК прайшла традыцыйная сустрэча з прызыўнікамі, якія ў хуткім часе будуць прызваны на службу ва Узброеныя Сілы. Хлопцы адправяцца ў розныя часці, каб асвойваць нялёгкія навыкі вайсковай справы. Тыя, хто закончыў школу або сярэдне-спецыяльную ўстанову, адслужаць паўтара года, з вышэйшай адукацыяй — год.
Пра некаторыя моманты службы і салдацкія абавязкі прызыўнікам расказаў начальнік адасобленай групы ваеннага камісарыята Андрэй Гайдукевіч. Ён адзначыў, што ва ўсе часіны служба ў арміі лічылася дастойнай школай, якую абавязаны прайсці кожны юнак. Прыемна, што многім хлопцам падабаецца служба, і далей свой лёс яны звязваюць з арміяй. Людзей, якія прайшлі вайсковую службу, аб’ядноўвае пачуццё адказнасці за свае ўчынкі, за сям’ю, краіну.
Па словах Андрэя Гайдукевіча, кіраўскія юнакі працягваюць слаўныя традыцыі, якія закладвала не адно пакаленне салдат, дастойна нясуць службу. І як вынік, многія камандзіры вайсковых часцей прыязджаюць за новым папаўненнем менавіта на Кіраўшчыну. Прыемна і бацькам хлопцаў, калі ад камандзіраў ідуць падзячныя лісты за бездакорную службу.
Андрэй Гайдукевіч пажадаў рабятам дастойна і з гонарам несці званне абаронца Айчыны, мужна выканаць свой абавязак, пасталеўшымі і здаровымі вярнуцца да сваіх родных і блізкіх.
Галоўны спецыяліст аддзела ідэалагічнай работы, культуры і па справах моладзі Вікторыя Бяляўская пажадала рабятам цікавай і карыснай службы, трывалых ведаў па пытаннях абароны сваёй Радзімы. Па яе словах, служба ў арміі многім дапамагла пераасэнсаваць некаторыя моманты жыцця, стаўленне да бацькоў, сяброў. Яна пажадала прызыўнікам удачы, маленькіх і вялікіх перамог над сабою.
Стойкасці духу, аптымізму, сапраўдных армейскіх сяброў пажадаў юнакам старшыня раённага грамадскага аб’яднання “Беларускі саюз ветэранаў вайны ў Афганістане” Юрый Сафронаў.
Праявіць свае самыя лепшыя якасці, дастойна несці службу па абароне правоў і інтарэсаў Беларусі, яе грамадзян, пажадаў прызыўнікам першы сакратар райкама ГА
“БРСМ”Алег Бойка.
Ад імя прызыўнікоў Сяргей Новікаў падзякаваў усім за словы падтрымкі, пажадаў юнакам знайсці сярод саслужыўцаў сапраўдных сяброў, якія падтрымаюць у самых розных сітуацыях, а таксама запэўніў, што кіраўскія прызыўнікі зробяць усё ад іх залежачае, каб дастойна пранесці званне абаронца Айчыны.
Работнікамі РДК для будучых воінаў была наладжана канцэртная праграма, праведзена віктарына. Юнакі з інтарэсам паглядзелі відэаролікі аб сучасным узбраенні Узброеных Сіл Рэспублікі Беларусь, армейскіх буднях, абмеркавалі пытанні патрыятычнага выхавання моладзі.
Фота Максіма МІКЕШЫНА.