Упершыню ў прызёрах юныя шашысты з Кіраўшчыны!

Спаборніцтвы па шашках, якія прайшлі ў Магілёве, адкрылі чарговую  круглагадовую абласную спартакіяду школьнікаў. Яны аказаліся ўдалымі для прадстаўнікоў Кіраўшчыны.

Удзел у спаборніцтвах прынялі 94 шашысты, якія ўвайшлі ў састаў 20 каманд. Гэта пераможцы раённых і гарадскіх турніраў. Да ўдзелу былі дапушчаны рабяты 2004 года нараджэння і маладзей. Наш раён прадстаўляла каманда, складзеная з вучняў СШ №1: Максім Жукоўскі (9 клас), Анастасія Бялянава (8 клас), Ілья Лебедзеў (5 клас) і Аляксей Бодык (4 клас).

Падапечныя трэнера Барыса Гаўрыленкі паказалі вельмі добрую падрыхтоўку і ў агульнакамандным заліку занялі 2 месца, абышоўшы зборную Магілёва і толькі крыху саступіўшы камандзе Бабруйска. Наогул кіраўчане ўпершыню трапілі на п’едэстал гонару ў спаборніцтвах такога рангу!

Ілья Лебедзеў, акрамя таго, стаў сярэбраным прызёрам яшчэ і ў асабістым першынстве. Ён, а таксама Аляксей Бодык залічаны кандыдатамі ў зборную каманду вобласці, якая будзе ўдзельнічаць у рэспубліканскім этапе спартакіяды.

Яшчэ варта адзначыць, што ў кіраўчан вельмі неблагія перспектывы для ўдзелу ў бліжэйшых сезонах, бо большасць членаў нашай сёлетняй каманды былі маладзей за сваіх сапернікаў, тым больш, што да наступнага абласнога этапу ёсць час і магчымасць умацаваць свае здольнасці.