Страляючыя лыжнікі з Кіраўшчыны — у ліку лепшых!
Каманда юных біятланістаў Паўлавіцкай СШ імя Р.А.Худалеева — удзельніца абласных спаборніцтваў “Снежны снайпер”
Бронзавыя прызёры абласных спаборніцтваў “Снежны снайпер” Крысціна Лазарава і Анастасія Котава
Як паведамлялася ўжо ў “Кіраўцы” і на сайце “раёнкі”, у Магілёве прайшоў абласны этап рэспубліканскіх спаборніцтваў сярод дзяцей і падлеткаў па біятлоне “Снежны снайпер” на прызы Прэзідэнцкага спартыўнага клуба. У Пячэрскім лесапарку, дзе праходзіла лыжная траса і размяшчаліся агнявыя рубяжы, сабралася больш за 270 удзельнікаў ва ўзросце 11-16 год з 23 каманд рэгіёна — пераможцы на мясцовых этапах.
Нагадаем, што на нядаўніх раённых спаборніцтвах бліскуча выступілі юныя біятланісты Паўлавіцкай СШ імя Р.А.Худалеева, якія сталі пераможцамі ва ўсіх узроставых групах у камандным заліку, а таксама паказалі лепшыя рэзультаты ў асабістым. Менавіта гэтай зборнай, як, да слова, і ў мінулыя гады, і было даручана абараняць гонар раёна ў абласным цэнтры. Аб тым, як праходзілі спаборніцтвы, нам расказаў кіраўнік каманды, настаўнік фізічнай культуры і здароўя Паўлавіцкай СШ імя Р.А.Худалеева Валерый Вароніч:
— Спаборніцтвы праходзілі на працягу трох дзён і ўключалі ў сябе дзве біятлонныя дысцыпліны — спрынт і эстафету. Традыцыйна фаварытамі спаборніцтваў “Снежны снайпер” на Магілёўшчыне з’яўляюцца прадстаўнікі Хоцімскага і Клімавіцкага раёнаў. І яны зноў пацвердзілі свой статус. Асабліва хацімчане, якія перамаглі ва ўсіх узроставых групах камандных гонак. Юныя біятланісты з Кіраўшчыны, шліфуючы свае ўменні, з кожным годам паказваюць усё больш высокія рэзультаты. І вось сёлета паўлавіцкія школьнікі смела ўмяшаліся ў барацьбу за ўзнагароды са спартсменамі мацнейшых каманд вобласці.
У выніку напружаных лыжных гонак і стрэльбаў на агнявых рубяжах самыя малодшыя нашы прадстаўнікі змаглі камандай заваяваць бронзавыя ўзнагароды. Лепшы вынік паказалі страляючыя лыжнікі з Кіраўшчыны у старэйшай групе: яны сталі ўладальнікамі “срэбра”, адсунуўшы на трэцяе месца каманду Клімавіцкага раёна. І толькі ў сярэдняй групе нашым рабятам давялося крыху шкадаваць: яны сталі чацвёртымі. Але ці варта засмучацца такому высокаму месцу?.. А наогул сёлетняе выступленне каманды з Кіраўшчыны было самым паспяховым за ўсю гісторыю правядзення абласных біятлонных спаборніцтваў.
Вызначыліся нашы паўпрэды і ў асабістым заліку. Дзве “бронзы” — на рахунку нашых дзяўчат. На прыступку п’едэстала гонару трапілі Анастасія Котава ў сярэдняй групе і Крысціна Лазарава ў старэйшай.
Па выніках спаборніцтваў з ліку лепшых юных біятланістаў сфарміравана зборная каманда Магілёўскай вобласці, якая з 4 па 10 лютага будзе прадстаўляць Прыдняпроўскі край у фінальным этапе “Снежнага снайпера” ў спорткомплексе “Раўбічы”. У састаў увайшлі вышэй названыя прадстаўніцы нашага раёна. Яшчэ трое рабят з Паўлавіцкай школы ўключаны ў рэзерв: Аліна Дырыкава і Андрэй Собалеў з малодшай групы, Радзівон Раманоўскі — са старэйшай групы.
Трэба адзначыць, што спаборніцтвы “Снежны снайпер” зноў прайшлі на высокім арганізацыйным узроўні і сталі аднымі з самых масавых. Дарэчы, кожны раз падчас іх правядзення ў юных біятланістаў мелася магчымасць сустрэцца і пагутарыць са знакамітымі спартсменамі мінулых часоў. У розныя гады на спаборніцтвы прыязджалі Сяргей Булыгін, Святлана Парамыгіна, Алег Рыжанкоў, Ігар Басінскі, Алена Зубрылава, Сяргей Далідовіч, Дар’я Домрачава, Людміла Ананька. Сёлетнія гонкі не сталі выключэннем: з юнымі біятланістамі вобласці сустрэўся сярэбраны прызёр Алімпійскіх гульняў 2010 года, двухразовы чэмпіён Еўропы Сяргей Новікаў. Так што, з пазітыўным настроем рабяты вярталіся дадому не толькі ад удалага выступлення, а і ад сустрэчы з легендарным біятланістам.