Увага — прафілактыцы правапарушэнняў
На чарговым пасяджэнні грамадскага пункта аховы правапарадку Дабаснянскага сельвыканкама па прадухіленні супрацьпраўных паводзін грамадзян былі падведзены вынікі работы камісіі Савета ГПАП за 2018 год.
Як адзначыла старшыня Дабаснянскага сельвыканкама Галіна Шчур, у мінулым годзе было праведзена 12 пасяджэнняў, 2 з іх — выязныя. Асноўная ўвага надавалася пытанням прафілактыкі адміністрацыйных правапарушэнняў, захавання правілаў супрацьпажарнага стану і інш.
Летась на тэрыторыі сельсавета адбылося 18 злачынстваў, раскрывальнасць іх склала 88,9%, па лініі крымінальнага вышуку — 13. За год было ўчынена 7 крадзяжоў (у 2017 г. — 4). Да адміністрацыйнай адказнасці прыцягнута 149 чалавек. На ўлік да ўрача-нарколага было пастаўлена 7 грамадзян, 3 — накіраваны ў ЛПП. Не зарэгістравана ў мінулым годзе злачынстваў у сферы сямейна-бытавых адносін.
Асноўная ўвага, па словах старшыні сельвыканкама, надавалася рабоце з мнага-
дзетнымі і сем’ямі, дзе дзеці знаходзяцца ў сацыяльна небяспечным становішчы. Усяго на тэрыторыі дадзенага сельсавета пражывае 17 мнагадзетных сем’яў. Летась дзеці з дзвюх былі прызнаны знаходзячыміся ў сацыяльна небяспечным становішчы. За ўмовамі пражывання такіх непаўналетніх наладжаны кантроль з боку членаў сельвыканкама, работнікаў мясцовых устаноў адукацыі, медработнікаў.
Летась члены камісіі СГПАП Дабаснянскага сельвыканкама прымалі ўдзел у сходах працоўных калектываў ААТ “Дабаснянскае”, КСУП “Жылічы”, у сустрэчах з жыхарамі аг.Жылічы, Добасна, в.Дабрыца, Лёўкавічы, Асаўнік.
Затым адбыўся разгляд персанальных спраў грамадзян, учыніўшых супрацьпраўныя ўчынкі. Варта адзначыць, што прычына, па якой яны былі запрошаны на пасяджэнне савета ГПАП, практычна адзіная — злоўжыванне спіртным. Адсюль і ўзнікшыя праблемы з законам. Хтосьці ў нецвярозым стане з’явіўся на работу, іншыя бадзяліся па вёсцы, двое мужчын пасля прыняцця саракаградуснай учынілі скандалы са сваімі жонкамі, за што і трапілі ў поле зроку міліцыі. З кожным была праведзена індывідуальная гутарка, грамадзян папярэдзілі аб наступствах падобных паводзін.
Фота
Людмілы СЯМЁНАВАЙ.