Падтрымка сем’яў з дзецьмі — адзін з ключавых напрамкаў дзяржаўнай сацыяльнай палітыкі, аснова дэмаграфічнай бяспекі краіны.

Дзяржава падтрымлівае мнагадзетныя сем’і дапамогамі і дадатковымі выплатамі, выдзяленнем ільготных крэдытаў на будаўніцтва жылля, прызначэннем сямейнага капіталу. З кожным годам такая падтрымка павялічваецца і ўзмацняецца.
Вось і на “Вялікай размове з Прэзідэнтам” тэма сем’яў з дзецьмі не была абыдзена ўвагай. Прэзідэнт Беларусі Аляксандр Лукашэнка закрануў у сваім выступленні пытанні забеспячэння мнагадзетных сем’яў жыллём, расшырэння межаў атрымання і выкарыстання імі сямейнага капіталу. Кіраўнік дзяржавы ўпэўнены, што жыллё для маладых сем’яў — добры стымул для нараджэння дзяцей.
Вось і мнагадзетныя бацькі Уладзімір і Таццяна Костка нядаўна сталі шчаслівымі ўладальнікамі ўласнай кватэры, аб якой марылі даўно. Нараджэнне трэцяга дзіцяці дапамагло маладой сям’і вырашыць жыллёвае пытанне. Сёння трое іх дзетак: 13-гадовы Антон, 9-гадовая Алена і першакласніца Вікторыя маюць магчымасць рыхтаваць урокі ці займацца любімай справай у прасторных пакоях.
Уладзімір нарадзіўся і вырас у Кіраўску. Падчас вайсковай службы па кантракце ў Лагойску пазнаёміўся са сваёй будучай жонкай Таццянай. Пасля вяселля маладыя каля 10 гадоў жылі ў Лагойску, у 2013 годзе бацькі Уладзіміра прапанавалі ім пераехаць на Кіраўшчыну.
Пасля вяртання на сваю малую радзіму галава сям’і ўладкаваўся на працу ў ДРБУ-197, дзе і працуе машыністам аўтагрэйдзера па сённяшні дзень. Дарэчы, кіраўніцтва арганізацыі вельмі задаволена добрасумленнай працай Уладзіміра, бо любую даручаную справу ён выконвае з уласцівай яму адказнасцю.
Таццяна Сяргееўна працуе ў санаторыі імя К.П.Арлоўскага. У вольны ад работы час жанчына дапамагае дзецям рабіць урокі, завіхаецца па гаспадарцы, а таксама вельмі любіць парадаваць сваю сям’ю смачнымі стравамі.
У размове з карэспандэнтам раённай газеты Уладзімір і Таццяна адзначылі, што без дапамогі дзяржавы сваю мару аб уласным жыллі яны наўрад ці змаглі б так хутка ажыццявіць.
Людміла СЯМЁНАВА.
Фота Максіма МІКЕШЫНА.