Працягваецца абласны месячнік па навядзенні парадку. Работы па добраўпарадкаванні  прылягаючых і замацаваных тэрыторый на Кіраўшчыне вядуць прадстаўнікі арганізацый, прадпрыемстваў, устаноў, сельскіх населеных пунктаў, а таксама школьнікі, індывідуальныя прадпрымальнікі.

Свой уклад у працэс навядзення парадку ў аг.Баравіца нядаўна ўносіла ТАА “Кантарэлус” на чале з яго дырэктарам Аляксеем Нагірняком. У якасці дапамогі Баравіцкаму сельскаму Савету дэпутатаў ім былі арганізаваны работы па добраўпарадкаванні парка каля гандлёвых кропак райспажыўтаварыства ў Баравіцы, памяшканне аднога з якіх — былога магазіна “Гаспадарчыя тавары” — зараз належыць таварыству з абмежаванай адказнасцю, дзе наладжана нарыхтоўка дзікарастучай прадукцыі — грыбоў, ягад.

Як адзначыў Аляксей Нагірняк, навесці парадак на зямлі, зрабіць, каб родны край быў больш прыгожым і ўтульным, — справа кожнага грамадзяніна. Гэтай жа думкі прытрымліваецца і жыхар аграгарадка Дзмітрый Кірэеў, які працуе ў ААТ “Рассвет імя К.П.Арлоўскага”, а ў выхадны дзень па-сяброўску дапамагаў індывідуальнаму прадпрымальніку ў абрэзцы непатрэбных галін з дрэў парка.