За радком Паслання Прэзідэнта — меркаванні жыхароў Кіраўшчыны (працяг)
Працягваем знаёміць з меркаваннямі па пытаннях, узнятых у Пасланні Кіраўніка дзяржавы беларускаму народу і Нацыянальнаму сходу.
Ігар КАНАНЧУК, дэпутат Палаты прадстаўнікоў Нацыянальнага сходу Рэспублікі Беларусь
па Бабруйскай сельскай выбарчай акрузе №80:
— У Пасланні Прэзідэнта былі закрануты надзённыя пытанні жыцця краіны, а таксама вызначаны задачы на бліжэйшую перспектыву.
Прагучала вельмі важная думка: самае галоўнае — дысцыпліна ўсюды і ва ўсім. Адсюль — і дыктатура тэхналогій: каб быў дастойны рэзультат у эканоміцы, трэба рабіць усё правільна і дакладна. Усё прапісана ясна, толькі не ўсюды на месцах кадры добрасумленна ставяцца да выканання сваіх абавязкаў, што адмоўна ўплывае на вынікі работы.
Галоўная сіла ўстойлівага развіцця Беларусі — людзі: калі спецыялісты на сваіх месцах, хварэюць душой за справу, то і будзе ўсё на належным узроўні.
У Пасланні правільна было адзначана, што будучыня — за буйнымі прадпрыемствамі, яны забяспечваюць асноўную экспартную складаемую. І ў сельскай гаспадцы перспектыва — за буйнатаварнай вытворчасцю.
Прэзідэнт агучыў пытанне, якое хвалявала актыўную частку грамадскасці — час правядзення выбарчых кампаній: Прэзідэнцкія выбары павінны адбыцца ў 2020 годзе, выбары ў Палату прадстаўнікоў і Савет Рэспублікі — сёлета. Кіраўнік дзяржавы падкрэсліў, што яны стануць экзаменам не толькі для кандыдатаў у дэпутаты, але і для кожнага выбаршчыка.
Па-ранейшаму сур’ёзна ставілася пытанне па карупцыі. Прымаўка “не бяры нічога і не бойся нікога” застаецца актуальнай. Прэзідэнт заявіў, што ў пытаннях барацьбы з карупцыяй паслабленняў не будзе, нават калі хто разлічвае на ранейшыя заслугі.
Дзякуючы прамой трансляцыі сумеснага пасяджэння Палаты прадстаўнікоў і Савета Рэспублікі ў Авальнай зале Дома ўрада, дзе Кіраўнік дзяржавы звярнуўся з Пасланнем да беларускага народа
і Нацыянальнага сходу, усе жадаючыя маглі назіраць за ходам мерапрыемства і пачуць усе аспекты Паслання. Яны былі данесены да жыхароў рэспублікі, каб усе адчулі важнасць узнятых пытанняў
і вызначаных задач.
Святлана Акуліч, дырэктар Барчыцкага НПК ДС-СШ:
— У Пасланні Прэзідэнта прагучалі словы пра тое, што трэба больш актыўна ўключаць у сістэму кіравання дзяржавай моладзь, сярод спецыялістаў разглядаць найбольш перспектыўных кіраўнікоў з лідарскімі якасцямі. Тых, хто хоча працаваць і чые думкі і ідэі сугучныя з мэтамі і задачамі развіцця краіны.
Я ўваходжу ў рэзерв кадраў на пасаду старшыні Скрыпліцкага сельвыканкама і цаню аказаны мне давер. Лічу, што прэтэндэнт на пасаду ў сістэме кіравання павінен пастаянна ўдасканальваць свае веды і навыкі, вучыцца ўкараняць іх на справе, дакладна ведаць будучыя абавязкі. У раёне для гэтага створаны ўсе ўмовы — кандыдаты на кіруючую пасаду маюць магчымасць наведваць пасяджанні райвыканкама, сесіі раённага Савета дэпутатаў, пасяджэнні Савета ГПАП і іншыя мерапрыемствы.
Адным з найбольш эфектыўных спосабаў атрымання практычнага вопыту з’яўляецца стажыроўка. Рэзервіст становіцца «назіральнікам» працэсу, атрымлівае карысную інфармацыю і набывае навыкі па практыцы кіраўніцкай дзейнасці, прымае ўскосны ўдзел у вырашэнні тых ці іншых задач. Яшчэ адзін спосаб навучання — гэта самаадукацыя, якая дазваляе не толькі назапасіць веды, але і паказаць, наколькі зацікаўлены ў гэтым сам рэзервіст.
Лічу важным правядзенне сустрэч кіраўніцтва раёна з перспектыўным кадравым рэзервам, паколькі гэта матывуе моладзь выяўляць сябе, развівацца, удзельнічаць у жыцці рэгіёна, пераймаць вопыт старэйшых.
Але не менш важныя жаданне і імкненне самога чалавека асвоіць новую дзейнасць, унесці свой уклад у агульную справу.