ПФК “Кіраўск-СДЮШАР” захавала лідарства ў чэмпіянаце краіны па пляжным футболе
У Гродне прайшоў другі тур нацыянальнага чэмпіянату па пляжным футболе. Ён супаў з адкрыццём у горадзе над Нёманам новага стадыёна.
Нагадаем, што пасля першага тура лідарства захапіла каманда ПФК “Кіраўск-СДЮШАР”, якая перамагла ва ўсіх згуляных трох матчах. Супраць лідараў, як вядома, настройваюцца па-асабліваму рашуча, таму і гуляць супраць апанентаў цяжэй. Тым не менш, кіраўчане зноў прадэманстравалі добрую зладжаную гульню. Прычым, адзначым, што выступалі без двух вядучых ігракоў Вадзіма Бокача і Арцемія Дразда.
У першым матчы наша каманда сустрэлася з аўтсайдэрам першага тура — камандай “Палессе” з Кобрына. Нягледзячы на названы статус, сапернікі аказалі вельмі дастойнае супраціўленне. Тым не менш, клас кіраўчан аказаўся вышэйшым — 6:5. Чатыры разы ў нашай камандзе вызначыўся Ягор Рэмізаў, па адным галу забілі Юрый Пятроўскі і Алег Якаўлеў.
Наступным апанентам кіраўчан стаў “Шчучын”. Нашы пляжнікі адразу ж завалодалі ініцыятывай і даволі хутка аформілі трывалую перавагу. А потым паслабілі тэмп. У выніку, хоць і давялі паядынак да перамогі, але зноў яна была мінімальнай: 5:4. І зноў вызначыўся Ягор Рэмізаў, які двойчы паразіў цэль, па адным галу забілі Алег Якаўлеў і Сяргей Рабінін.
На наступны дзень СДЮШАРаўцы супраць М-Сіці з Мазыра адразу ж сталі націскаць на вароты саперніка і павялі 4:0, а давесці такі матч да перамогі было справай тэхнікі — 5:1. Зноў герой матча — Ягор Рэмізаў, на рахунку якога хет-трык. Давяршылі разгром мазыран Ягор Гардзецкі і Алег Якаўлеў.
Драматычным для “Кіраўск-СДЮШАР” аказаўся апошні паядынак тура з брэсцкай камандай “ProDom”. Ва ўпартай барацьбе брастчанам удалося-такі вырваць перамогу ў фаварыта сёлетняга чэмпіянату, чаго не змог зрабіць ніхто — 5:6. Тым не менш, кіраўчане захавалі лідарства і трохачковы запас. Зараз у іх 18 ачкоў, на другім і трэцім месцах адпаведна ідуць “Гроднааблспорт” і “ProDom” (Брэст) — па 15 ачкоў.