Учора, калі ветрык расцягнуў аблокі і заззяла яркае сонейка, рэдакцыйны аўтамабіль узяў курс на палеткі самай вялікай гаспадаркі раёна — ААТ “Рассвет імя К.П.Арлоўскага”. Аб’ектам увагі “раёнкі” стала ўборка кукурузы, якую вядуць мясцовыя аграрыі. Шчыра кажучы, сумненняў у тым, што “царыца палёў” тут урадзіла на славу, не было. Праязджаючы па мясцовых дарогах, на палях сельгаставарыства многія кіраўчане і госці раёна назіралі, якой густой высокай сцяной стаяла кукуруза.
Пракаменціраваць ход правядзення ўборкі кукурузы, нарыхтоўкі кармоў і іншых палявых работ мы папрасілі першага намесніка дырэктара ААТ “Рассвет імя К.П.Арлоўскага” Аляксандра Жылінскага:
— Шчыра кажучы, сёлетняя корманарыхтоўчая кампанія прыносіць сапраўднае задавальненне: кукуруза, якая займала плошчу ў 3269 га, радуе ўраджайнасцю сакавітай масы — на круг атрымліваем па 550 ц. Сёлетняе лета з дастатковай колькасцю дажджоў было на карысць гэтай культуры, станоўча паўплывалі на яе рост захаванне тэхналогіі пры сяўбе і належны догляд за раслінамі.
Актыўны тэмп работ ужо дазволіў нам убраць кукурузу на 950 га. У сіласныя траншэі закладзена больш за 49 тыс. т сакавітых кармоў.

За тым, каб нарыхтаваная маса была якаснай, з неабходнай вільготнасцю і тэмпературай, назіраюць адказныя спецыялісты. Маючы вялізны статак БРЖ, мы проста абавязаны прыкласці ўсе намаганні і забяспечыць яго належнымі кармамі.
Пад’езды да траншэй, дзе вядзецца закладка сіласу, абавязкова засцелены саломай, пад асаблівым кантролем — якасць трамбоўкі.
Уборку і здрабненне зялёнай масы на высокаэфектыўных камбайнах вядуць тры механізатары — Міхаіл Вербенка, Канстанцін Пятруша і Віталь Шчэрбіч.
Як адзначаюць працаўнікі, убіраць такі ўраджай ім за радасць. Літаральна праз некалькі дзясяткаў метраў руху кормакамбайна, кузавы і прычэпы сельгастэхнікі напаўняюцца духмянай травяной масай. Таму на адвозцы мы задзейнічалі 12 адзінак тэхнікі. Кіруюць імі таксама вопытныя і адказныя працаўнікі, сярод іх — Валерый Шчэрбіч, Юрый Асташоў, Сяргей Пятроў, Сяргей Акуленка, Мікалай Ігольчык і іншыя.
Для таго, каб работы вяліся без прастойвання і кормаўборачнай, і тэхнікі на адвозцы, закладку кармоў вядзем на максімальна кароткай адлегласці ад кукурузных палеткаў. На МТК “Кірава” ўжо хутка будзе закрыта 4-я траншэя. Асаблівую ўвагу надаем належнаму закрыццю сіласных траншэй з кармамі.
Нягледзячы на ўсю важнасць правядзення ўборкі кукурузы, не застаецца па-за нашай увагай і не менш важная кампанія — сяўба азімых. Ужо на 2 тыс. га работы намі праве­дзены: зярняты леглі ў добра падрыхтаваную і ўгноеную глебу. На сяўбе задзейнічаны добрасумленныя і адказныя працаўнікі — Мікалай Дрозд і Дзмітрый Кахновіч.
Паралельна вядзем уборку цукровых буракоў, якія сёлета займаюць плошчу ў 292 га. Уражайнасць салодкіх каранёў таксама радуе: каля 600 ц/га. Сабраны ўраджай адпраўляем на Асіповіцкі буракапрыёмны пункт.
Удзельнікі палявых работ забяспечваюцца гарачым харчаваннем. За якасна і своечасова праведзеныя работы працаўнікі атрымліваюць дастойныя заробкі.
Варта адзна­чыць, што кожны з адказнасцю ставіцца да выканання даручанай справы, а гэта дае спадзяванне, што ўсё намечанае намі будзе выканана ў вызначаныя тэрміны і якасна.
Падрыхтавала
Людміла СЯМЁНАВА.
Фота
Максіма МІКЕШЫНА.