Для прыняцця неабходных мер
У мінулую суботу “прамую тэлефонную лінію” ў райвыканкаме правёў кіраўнік раёна Міхаіл Гулы.
Да яго з праблемнымі пытаннямі звярнулася двое грамадзянак раёна, абодва пытанні тычыліся тэмы добраўпарадкавання населеных пунктаў, у тым ліку ўтрымання вулічнадарожнай сеткі.
Жыхарка аг.Паўлавічы В.Р.Шамаль адзначыла, што па вул.Цэнтральнай іх аграгарадка немагчыма прайсці – дарожнае пакрыццё ў нездавальняючым стане – і выказала просьбу зрабіць падсыпку і грэйдзіраванне дарогі.
Пытанне накіравана для разгляду і прыняцця мер в.а. дырэктара УКП “Жылкамгас” Сяргею Марцючэнку, тэрмін выканання – да 3 красавіка бягучага года.
Стараста в.Шалаёўка Н.А.Шэпетава паведаміла, што ўвосень мінулага года пасля яе звароту на “прамую лінію” УКП “Жылкамгас” у іх вёсцы былі выкананы работы па падсыпцы дарожнага палатна ў месцах праходжання цеплатрасы, зроблена грэйдзіраванне дарогі. На думку заяўніка, работы былі зроблены няякасна, патрабуецца паўторная падсыпка.
Разгледзець пытанне з выездам на месца, прыняць неабходныя меры даручана начальніку аддзела архітэктуры, будаўніцтва і жыллёвакамунальнай гаспадаркі райвыканкама Вользе Дзякавай, в.а. дырэктара УКП “Жылкамгас” Сяргею Марцючэнку, в.а. старшыні Баравіцкага сельвыканкама Юрыю Бабіцкаму.
Кіраўнік раёна даручыў адказным асобам арганізаваць сустрэчу з жыхарамі в.Шалаёўка.
З пачатку 2020 года ў райвыканкаме па суботах праведзена 12 “прамых тэлефонных ліній”, на якія паступіла 11 зваротаў.
Падрыхтавала Наталля ХАДАКОВА.
Фота аўтара.
