НА ПЕРШЫМ МЕСЦЫ – ПРАФІЛАКТЫКА
У барацьбе з каранавірусам, як, дарэчы, і з любой іншай інфекцыяй, важнае значэнне маюць прафілактычныя меры. Асцярожнасць, выкананне і захаванне элементарных правілаў гігіены залішнімі не бываюць ніколі, асабліва зараз.
Адзін з немалаважных накірункаў прафілактычных мерапрыемстваў – устаноўка і размяшчэнне ў аб’ектах гандлю, грамадскага харчавання, месцах масавага знаходжання людзей разнастайных дэзынфіцыруючых сродкаў і інфармацыйна-прапагандысцкай друкаванай прадукцыі медыцынскага профілю.
Прадстаўнікі райЦГЭ праводзяць маніторынгі па арганізацыях і ўстановах раёна, падчас якіх правяраюць наяўнасць дазатараў з антысептыкамі для апрацоўкі рук, як для працуючых, так і наведвальнікаў. На кантролі – правядзенне вільготных санітарных апрацовак памяшканняў дэзсродкамі.
Першымі, як і належыць па спецыфіцы прафесіі, зладжанасць прадэманстравалі медыкі. Яшчэ ў сакавіку, калі назіраўся сезонны ўсплеск захворванняў ВРВІ, ва ўстановах аховы здароўя раёна быў уведзены масачны рэжым, у аддзяленнях увялі карантын, змяніўся графік і парадак наведвання хворых.
Меры прафілактыкі прадпрынялі ў арганізацыях і на прадпрыемствах, якія працуюць з вялікай колькасцю людзей: магазінах і аб’ектах грамхарчу райспажыўтаварыства, філіяле “Аўтапарк №14” і інш.
Належным чынам наладжана работа па прафілактыцы распаўсюджвання каранавірусу ў філіяле “Аўтапарк №14”. Двойчы на дзень праводзіцца поўная апрацоўка дэзынфіцыруючымі сродкамі салонаў аўтобусаў. На ўваходзе ў транспартным сродку маюцца дазатары з антысептыкамі для апрацоўкі рук пасажыраў. Вадзіцелі забяспечаны антыбактэрыяльнымі сурвэткамі, а таксама вадкімі спецпрэпаратамі для апрацоўкі салона аўтобуса, у выпадку вострай неабходнасці, і рук.
На аўтастанцыі пры ўваходзе маецца інфармацыйны стэнд аб мерах прафілактыкі каранавірусу, побач – навясны дазатар з антысептыкам.
Як адзначыў вядучы інжынер па арганізацыі перавозак філіяла “Аўтапарк №14” Валерый Каранкевіч, у іх арганізацыі ў наяўнасці неабходны запас дэзынфіцыруючых сродкаў як для апрацоўкі спецтранспарту, так і для ўласнай гігіены работнікаў і пасажыраў. Касіры аўтастанцыі ў рабоце з кліентамі выкарыстоўваюць індывідуальныя медыцынскія маскі і пальчаткі, маюцца і дэзсродкі. Кожныя 2 гадзіны апрацоўваюцца крэслы ў зале чакання, дзвярныя ручкі, падаконнікі, мыецца падлога.
Дазатары са спецсродкамі стаяць у адміністрацыйным будынку аўтапарка №14, у майстэрнях і гаражах, кожны з работнікаў мае да іх свабодны доступ. На станцыі тэхабслугоўвання аўтамабіляў апрацаваць рукі могуць і кліенты.
Хутка адрэгавалі на новыя правілы абслугоўвання пакупнікоў магазіны і аб’екты грамхарчу райспажыўтаварыства. Паўсюдна размешчана інфармацыя аб спосабах абароны сябе і сваіх родных ад каранавірусу, рэкамендацыі аб захаванні паміж пакупнікамі адлегласці не менш 1,5-2 метры. У спецыяльна вызначаных месцах маюцца дазатары з антысептыкамі. Тэхперсанал апрацоўвае дэзынфіцыруючымі сродкамі дзвярныя ручкі, падаконнікі, іншыя паверхні, мые падлогу. Сярод прадаўцоў уведзены масачны рэжым, таксама яны выкарыстоўваюць пры абслугоўванні пакупнікоў пальчаткі.
Захаванне элементарных мер прафілактыкі – дзейсная абарона ад інфекцыі.
Людміла СЯМЁНАВА.
Фота аўтара.