У КІРАЎСКУ ПАСАДЗІЛІ ЯШЧЭ АДЗІН ПАРК
У мінулую суботу ў межах кампаніі “Уладкуем малую радзіму”, прысвечанай 75-годдзю Вялікай Перамогі, у Кіраўску быў закладзены новы парк каля шматпавярховак па вул.Церашковай у раёне СШ №1.
Ініцыятарамі правядзення сталі раённая інспекцыя прыродных рэсурсаў і аховы навакольнага асяроддзя і раённы цэнтр гігіены і эпідэміялогіі, менавіта прадстаўнікі гэтых арганізацый, а таксама камунальнікі і прынялі ўдзел у пасадцы дрэў.
(15:26) Падрыхтоўчыя работы былі праведзены работнікамі УКП “Жылкамгас”. Частку саджанцаў, а ўсяго тут было высаджана 60 клёнаў, бяроз і ліп, прадаставіў Жыліцкі сельгаскаледж.
Цудоўны настрой быў у ўдзельнікаў мерапрыемства ад усведамлення таго, што іх праца прынясе карысць людзям, і яшчэ на адно прыгожае месца адпачынку ў нашым горадзе стане больш.
Варта адзначыць, што некаторыя кіраўчане праявілі ініцыятыву і вырашылі паўдзельнічаць у работах па азеляненні тэрыторый. Так, сямейная пара Мікалая і Яўгеніі Мароз каля шматпавярховага дома №75 па вул.Гагарына, дзе яны пражываюць, высадзілі і даглядаюць 10 маладых дрэў.
Як адзначыў начальнік райінспекцыі прыродных рэсурсаў і аховы навакольнага асяроддзя Міхаіл Каранкевіч, пасадка дрэў – гэта своеасаблівы ўклад у азеляненне малой радзімы, паляпшэнне экалогіі і жаданне зрабіць свой горад ці вёску больш прыгожай і квітнеючай.
Ён нагадаў, што гэты год – вельмі важны для Беларусі – сёлета краіна адзначыць 75-ю гадавіну Вялікай Перамогі. Акрамя таго, працягваюцца мерапрыемствы, прымеркаваныя да Года малой радзімы, таму навядзенне парадку на зямлі, добраўпарадкаванне і азеляненне тэрыторый мае асаблівае значэнне. Ужо сёння трэба задумацца над тым, што мы пакінем пасля сябе нашым дзецям і ўнукам.
Міхаіл Каранкевіч праз раённую газету заклікае жыхароў Кіраўшчыны і надалей падтрымліваць ініцыятывы, накіраваныя на росквіт раёна і краіны.
Людміла СЯМЁНАВА. Фота аўтара.