Работы па дэзінфекцыі праводзяцца на пастаяннай аснове
У мэтах прафілактыкі, недапушчэння распаўсюджвання каранавіруснай інфекцыі УКП “Жылкамгас” працягвае правядзенне работ па дэзінфекцыі месцаў агульнага карыстання, дзіцячых пляцовак, аўтобусных прыпынкаў, вуліц і іншых.
Як паведаміў майстар жыллёва-камунальнай гаспадаркі Ігар Фядулаў, брыгада па дэзінфекцыі працуе штодзённа. Так, пад пільнай увагай камунальнікаў – 6 інтэрнатаў, дзе ажыццяўляецца апрацоўка спецпрэпаратамі лесвічных пралётаў, сцен, падлогі, поручняў. Такія ж мерапрыемствы праводзяцца ў пад’ездах шматпавярховых дамоў, якіх на абслугоўванні УКП “Жылкамгас” 221. Акрамя таго, прыбіральшчыцы дадаткова мыюць з дэзсродкамі дзверы і дзвярныя ручкі, вокны і падаконнікі, паштовыя скрыні.
Пастаянна ажыццяўляецца санітарная ачыстка дзіцячых пляцовак. Работнікі дэзрастворам з дапамогай апырсквальніка апрацоўваюць
арэлі, горкі, лаўкі і іншыя аб’екты для гульні рабят і адпачынку дарослых.
У адпаведнасці з санітарнымі правіламі з дапамогай палівамыйнай машыны са спецсродкамі праводзіцца апрацоўка асфальтабетоннага пакрыцця вуліц горада і дваравых тэрыторый шматпавярховых дамоў, прыпынкаў грамадскага транспарту, якія знаходзяцца на балансе УКП “Жылкамгас”.
У наяўнасці ў камунальнікаў дастатковая колькасць дэзінфіцыруючых сродкаў.
На здымку: камунальнікі вядуць апрацоўку дэзсродкамі дзіцячай пляцоўкі ў гарадскім парку.
Фота Максіма МІКЕШЫНА.