Згодна рашэння Генеральнай асамблеі ААН штогод 21 верасня адзначаецца Міжнародны дзень міру, ён прысвечаны ўмацаванню ідэалаў міру як унутры дзяржаў і народаў, так і на міжнародным узроўні.
У Беларусі Дзень міру святкуецца ў трэці аўторак верасня, гэтая дата ўстаноўлена з 1998 года і заклікана звярнуць асаблівую ўвагу грамадскасці на праблему захавання міру і спакою ва ўсім свеце.

Мы – за мір і згоду паміж людзьмі і дзяржавамі!

Важкі ўклад у міратворчыя справы ўносіць раённая арганізацыя ГА “Беларускі фонд міру”, аб дзейнасці якой расказала рэдакцыі яе старшыня Вольга ГАРШКОВА:
– Мэта Фонду міру – актыўнае садзеянне ўмацаванню міру, дружбы і згоды паміж людзьмі і народамі, увасабленне ў жыццё ідэй міласэрнасці і гуманізму.
Нагадаю, што ў цэнтры ўвагі міратворцаў раёна – рэалізацыя наступных праграм: “Памяць”, “Клопат”, “Мая Радзіма – Беларусь”, “Падтрымка дзіцячых праграм”, “Падтрымка таленавітай моладзі”, “За здаровы лад жыцця”, “Народная дыпламатыя”, а таксама сацыяльна значных акцый і праектаў для розных катэгорый грама­дзян, сем’яў і дзяцей.
Сёлетні год праходзіць пад знакам 75-годдзя Вялікай Перамогі. Прыярытэтныя напрамкі дзейнасці раённай арганізацыі Фонду міру – увекавечанне памяці абаронцаў Айчыны і ахвяр Вялікай Айчыннай вайны, арганізацыя і ўдзел у дабрачынных і міратворчых мерапрыемствах, прысвечаных слаўнай даце, патрыятычнае і духоўнае выхаванне насельніцтва, у першую чаргу, моладзі.
Наша раённая арганізацыя першай сярод раёнаў вобласці пералічыла грашовыя сродкі на рэканструкцыю мемарыяльнага комплексу “Памяці спаленых вёсак Магілёўскай вобласці ў в.Боркі”. Яго ўрачыстае адкрыццё з удзелам Прэзідэнта Рэспублікі Беларусь А.Р.Лукашэнкі стала знакавай падзеяй гэтага года.
Сёлета былі выдзелены сродкі для экскурсійнай паездкі актывістаў нашай арганізацыі, а таксама РГА “Белая Русь”, ГА “БРСМ” на мемарыял “Буйніцкае поле”.
Ушаноўваем ветэранаў вайны і працы з нагоды дзяржаўных свят і асабістых юбілеяў, гэтыя заслужаныя людзі, якія адстаялі мір на нашай зямлі і ўзнімалі з руін разбураную народную гаспадарку, заўсёды агорнуты нашай увагай.
На ўрачыстым мерапрыемстве з нагоды 85-годдзя ўтварэння Кіраўскага раёна ветэранам працы, былым кіраўнікам арганізацый і прадпрыемстваў былі ўручаны падарункі.
Наша раённая арганізацыя актыўна ўдзельнічае ў грамадска-палітычным жыцці. Дзейснай была яе работа падчас правядзення прэзідэнцкай выбарчай кампаніі.
У межах рэалізацыі праграмы “Народная дыпламатыя” была арганізавана сяброўская сустрэча з дэлегацыяй Белгародскага раёна-пабраціма, прысвечаная 85-годдзю ўтварэння Кіраўскага раёна.
Мы таксама аказваем са­дзеянне ў рэалізацыі дзіцячых праграм, падтрымцы адоранай моладзі, мнагадзетных сем’яў, найменьш абароненых слаёў насельніцтва і інш.
Дзякуючы падтрымцы міратворчага руху органамі ўлады, раённымі структурамі грамадскіх аб’яднанняў, працоўнымі калектывамі, грамадскасцю раёна паспяхова рэалізуюцца мерапрыемствы і акцыі Фонду міру. Зразумела, што такая дзейнасць магчымая толькі пры непасрэдным удзе­ле ўсіх грамадзян, бо Фонд міру фарміруецца выключна з добраахвотных ахвяраванняў. За перыяд са студзеня па 15 верасня бягучага года на рахунак нашай арганізацыі паступіла 6590,76 рублёў (143% плана на год), якія былі зрасходаваны на пералічаныя вышэй і іншыя мэты. Найбольшы ўклад унеслі калектывы ААТ “Рассвет імя К.П.Арлоўскага”, цэнтральнай раённай бальніцы, КСУП “Чырвоны баец”, “Ніва-Барсукі”, “Барчыцы-агра”, раёна электрасетак, аўтапарка №14, Жыліцкага сельгаскаледжа, устаноў адукацыі раёна. Вялікая ўдзячнасць усім, хто праяўляе канкрэтны клопат аб міры, шчасці, будучыні.
З 16 па 22 верасня ў нашай краіне праходзіць Тыдзень міру, падчас якога ва ўстановах адукацыі, культуры, арганізацыях праводзяцца тэматычныя мерапрыемствы. Традыцыйна, дзецям, якія нарадзіліся ў Міжнародны дзень міру, будзе прысвоена ганаровае званне “Дзіця міру”.
Пытанні міру, добрасуседства былі і застаюцца для беларускага народа асноватворнымі – пра гэта мы заяўляем у цяперашні неспакойны час. Трэба зрабіць усё магчымае, каб захаваць мір, спакой і згоду ў нашай роднай краіне!