Больш за 55 год галоўная дарожная арганізацыя раёна, якая цяпер носіць назву філіял КУП “Магілёўаблдарбуд” ДРБУ-197, займаецца рамонтам і абслугоўваннем дарог Кіраўшчыны. І, варта адзначыць, са сваімі абавязкамі сённяшні калектыў спраўляецца прафесійна: ад спецыялістаў да дарожных рабочых старанна шчыруюць на сваіх месцах і вызначаных аб’ектах, адказна выконваюць пастаўленыя перад імі задачы па ўтрыманні ў належным стане транспартнай сеткі раёна.

Аб праведзенай рабоце і планах на бліжэйшую перспектыву – наша размова напярэдадні прафесійнага свята з начальнікам філіяла КУП “Магілёўаблдарбуд” ДРБУ-197 Віталем ТОКАРАВЫМ:
– Нязменнымі застаюцца задачы, якія выконвае наш калектыў: асфальтаванне дарог, іх грэйдзіраванне, падсыпка, рамонт, а зімой яшчэ і расчыстка ад снегу, пасыпка супрацьгалалёднымі сумесямі, устаноўка аўтобусных прыпынкаў і іх санітарная ачыстка і многае іншае.
На сённяшні дзень у нас на абслугоўванні знаходзіцца 454 км дарог, з іх 244,1 км маюць асфальтабетоннае пакрыццё, астатнія – гравійныя і грунтовыя дарогі, 20 мастоў і 559 водапрапускных труб. Для таго, каб усе гэтыя аб’екты своечасова даглядаць і рамантаваць, тэмп работ не зніжаем круглы год.
Сярод найбольш значных аб’ектаў сёлета – бягучы рамонт участка аўтадарогі Новы Гарадок – Стайкі – Чыгірынка, дзе зроблена 4,9 км асфальтабетоннага пакрыцця. Мяркую, многія аўтамабілісты раёна ўжо ацанілі, наколькі камфортна стала тут праязджаць.
Імкнемся не зніжаць актыўныя тэмпы правядзення ямачнага рамонту. Выканаць значныя аб’ёмы дазваляе спецустаноўка “Тайфун”. З надыходам халоднага надвор’я будзем выкарыстоўваць другі агрэгат, работа якога разлічана ў тым ліку і на нізкія тэмпературы – рэцыклер асфальтабетона. З дапамогай гэтых установак нам удалося значна палепшыць стан дарожнага палатна.
У бліжэйшы час па дагаворах з УКП “Жылкамгас” правядзем ямачны рамонт на вуліцах горада, у некаторых населеных пунктах. У планах – устаноўка дзвюх аўтобусных прыпынкаў, такую просьбу агучылі жыхары аднаго з населеных пунктаў раёна падчас правядзення сустрэч рабочай групы райвыканкама з насельніцтвам, рамонты дарог, дзе маецца ямачнасць. Трэба адзначыць, што рамонтныя работы на дарогах раёна не прыпыняем ні на дзень, аднак, асфальтабетоннае пакрыццё, якому ўжо не адзін дзясятак год, вельмі хутка псуецца, у тым ліку і з-за пагодных фактараў, асабліва зімой.
З мэтай паляпшэння фінансавага стану філіяла імкнемся знаходзіць і выконваць дадатковыя аб’ёмы работ. Так, сёлета займаліся добраўпарадкаваннем тэрыторый ферм і зернесушыльных комплексаў сельгаспрадпрыемстваў, прылягаючых да арганізацый і ўстаноў тэрыторый, вуліц населеных пунктаў раёна, дзе выступалі ў якасці падрадчыкаў. Прынялі ўдзел у добраўпарадкаванні тэрыторыі райбальніцы. Працавалі на аб’ектах у Клічаўскім раёне. Значная работа была праведзена падчас рэканструкцыі мемарыяльнага комплексу “Памяці спаленых вёсак Магілёўскай вобласці” ў в.Боркі.
Немалаважным у дзейнасці прадпрыемства лічым эканомію рэсурсаў, для чаго ўпор пры правядзенні работ робім на выкарыстанне мясцовых матэрыялаў: дапамагае ў гэтым наяўнасць свайго асфальтабетоннага завода. Скарачаем выкарыстанне транспарту іншых арганізацый, з гэтай мэтай набылі сёлета 20-тонны МАЗ. Павялічваем аб’ёмы работ па прамых дагаворах, вядзем строгі кантроль за расходваннем гаруча-змазачных матэрыялаў, за некаторымі ва­дзіцелямі і трактарыстамі замацаваны па дзве адзінкі тэхнікі, што дазваляе не павялічваць без неабходнасці штат работнікаў.

Прадпрымаемыя калектывам захады даюць свой плён: тэмп росту аб’ёму дарожных работ у параўнанні з адпаведным перыядам 2019 г. павялічыўся на 21%, аб’ём падрадных работ, выкананых уласнымі сіламі – на 36,4%. На 21,8% узрасла выручка ад рэалізацыі прадукцыі, работ і паслуг, больш чым на 14% – прыбытак ад рэалізацыі прадукцыі.
На сённяшні дзень у ДРБУ-197 працуе 77 чалавек, і кожны з іх уносіць свой уклад у агульную справу. Касцяк калектыву – вопытныя людзі, якія прысвяцілі дарожнай службе не адзін дзясятак год. У сувязі з прафесійным святам будзе адзначаны шэраг лепшых прадстаўнікоў калектыву.
Высокага звання “Ганаровы дарожнік Беларусі” ІІ ступені ўдастоена галоўны інжынер Алена Варацілкіна. Алена Іванаўна – адзін з самых вопытных спецыялістаў у нашай сферы, граматны і высокапрафесійны работнік. У яе працоўнай кніжцы запісана адзінае месца работы – ДРБУ-197, якому яна прысвяціла больш за 34 гады. Родам Алена Варацілкіна з Гомельшчыны. Пасля заканчэння школы вучылася па спецыяльнасці “будаўніцтва і эксплуатацыя аўтамабільных дарог” у Гомельскім дарожна-будаўнічым тэхнікуме. Пры размеркаванні малады спецыяліст абрала месцам абавязковай адпрацоўкі наш раён. І з таго часу свае веды, навыкі і каштоўны вопыт прымяняе на кіраўскіх дарогах.
Вытворца работ Анатоль Пархамовіч удастоены Ганаровай граматы Магілёўскага аблвыканкама. Ён таксама з кагорты старажылаў калектыву. Ганаровымі граматамі КУП “Магілёўаблдарбуд” адзначаны начальнік планава-вытворчага аддзела Святлана Міхалап, вадзіцель аўтамабіля Віктар Шлапакоў, трактарыст Іван Іваноў. Шэраг адказных работнікаў будзе ўзнагароджаны граматамі ДРБУ-197: галоўны бухгалтар Наталля Сысоева, начальнік бюро механізацыі Сяргей Пятруша, механік Валерый Мельнік, вадзіцелі Леанід Манько, Дзмітрый Мароз і Ігар Русецкі, трактарыст Леанід Садоўскі, машыніст аўтагрэйдзера Уладзімір Костка, машыніст змешвальніка асфальтабетона Ігар Трысцянецкі, машыніст камбінаванай машыны Сяргей Алёшкін, дарожныя рабочыя Аляксей Заркевіч і Андрэй Каранкевіч.
Шчыра кажучы, многія з нашых работнікаў дастойныя слоў удзячнасці за добрасумленнае стаўленне да сваіх абавязкаў. У любой справе самае важнае – надзейныя кадры, з якімі па сілах выкананне вытворчых задач. У нашым калектыве іх шмат, таму мы з упэўненасцю глядзім у будучыню.
Размову вяла Людміла СЯМЁНАВА.
Фота аўтара.