Сусветны дзень пошты, які штогод адзначаецца 9 кастрычніка, быў устаноўлены Сусветным паштовым саюзам у 1969 годзе. Гэтае свята, якое супрацоўнікі галіны паштовых паслуг па праву лічаць прафесійным, уваходзіць у сістэму міжнародных дзён ААН і заклікана садзейнічаць папулярызацыі і развіццю паштовага абслугоўвання.

Нацыянальным аператарам паштовай сувязі ў Беларусі з’яўляецца РУП “Белпошта”. Пад дэвізам: “Хуткасць, на­дзейнасць, даступнасць!” штодзённа супрацоўнікі кампаніі працуюць над павышэннем якасці і канкурэнтаздольнасці прадастаўляемых паслуг.
Начальнік Кіраўскага ўчастка паштовай сувязі Магілёўскага філіяла РУП “Белпошта” Людміла Гушчына расказала, што крок за крокам паштовымі работнікамі ажыццяўляецца папулярызацыя канкурэнтаздольных паслуг, укараняюцца новыя праграмныя прадукты, паляпшаюцца тэхналагічныя працэсы, удасканальваецца лагістыка, павышаецца якасць сэрвісу. У тым ліку і на Кіраўшчыне. 13 сельскіх, 1 гарадское аддзяленні і 2 пункты паштовай сувязі абслугоўваюць 121 населены пункт нашага раёна.
З мэтай максімальнага набліжэння паслуг паштальёны пры абыходзе сваіх участкаў прапаноўваюць грамадзянам шырокі спектр паштовых і няпрофільных паслуг. Напрыклад, адначасова з дастаўкай пошты і друкаваных сродкаў масавай інфармацыі, па жаданні кліента, паштальён можа аформіць падпіску на перыядычныя выданні, прадаць канверты, паштоўкі, выплаціць пенсію, прыняць плацяжы, заказаць для сяльчан тавары штодзённага попыту і іншае.
Дзякуючы матарызаванаму спосабу дастаўкі – калі паслугі аказвае паштальён на аўтамабілі – камфортным паштовым абслугоўваннем ахоплены і жыхары аддаленых населеных пунктаў. У нашым раёне матарызаваным спосабам абслугоўваецца 67 вёсак, 15 з іх – а гэта 982 сельскіх жыхары – у межах прафесійных абавязкаў паштальёна матарызаванай дастаўкі Паўлавіцкага аддзялення паштовай сувязі Вольгі Каранкевіч (на здымку).
У дзень Вольга Леанідаўна праязджае больш сотні кіламетраў. Яе з нецярпеннем чакаюць вяскоўцы, прычым, не толькі каб скарыстацца паштовымі паслугамі, але і абмяняцца добрымі словамі з ветлівым прыемным паштальёнам.
Па словах Людмілы Гушчынай, аб рабоце Вольгі Каранкевіч прыходзяць толькі станоўчыя водгукі, бо да сваёй справы жанчына ставіцца з душой, стараецца працаваць на карысць людзям.
Фота Максіма МІКЕШЫНА.