Натарыусы – спецыялісты, якія ў сваёй штодзённай рабоце актыўна абараняюць правы і інтарэсы грамадзян, грамадства і дзяржавы. У гэтай прафесіі натарыус натарыяльнай канторы Кіраўскага раёна Магілёўскага натарыяльнай акругі Марына Манько ўжо больш за 12 год. Да яе звяртаюцца за правядзеннем натарыяльных дзеянняў не толькі жыхары раёна, але і іншых населеных пунктаў, краін замежжа. Акрамя афармлення дакументаў яна займаецца кансультаваннем насельніцтва па самых розных пытаннях, якія ўваходзяць у кампетэнцыю натарыяльных кантор.
У кампетэнцыі натарыуса – вырашэнне пытанняў са спадчынай, афармленнем розных здзелак, заключэннем шлюбнага дагавора, складаннем завяшчання, пасведчаннем даверанасці або адпраўленнем дзіцяці за мяжу і многія іншыя. Традыцыйнымі сталі бясплатныя кансультацыі насельніцтва, прымеркаваныя да святочных дат, прафесійнага свята юрыстаў.
Калі ж здараецца, што праблема, па якой людзі звярнуліся да Марыны Аляксандраўны, па-за яе спецыялізацыі, натарыус заўсёды накіруе да спецыялістаў, у якіх можна атрымаць кансультацыю, знайсці вырашэнне.
Галоўным у сваёй рабоце Марына Манько лі­чыць не дапусціць сітуацый, калі парушаюцца правы грамадзян, папярэдзіць іх ад магчымых праблем і наступстваў, якія могуць узнікнуць у будучым з-за няправільна ці ўвогуле неаформленых дакументаў, у большасці – маёмасных. Менавіта з-за іх часцей за ўсё паміж нашчадкамі ўзнікаюць праблемы, спрэчкі, суды.
З кожным годам пералік паслуг, аказваемых натарыусам, пашыраецца. Натарыяльныя дзеянні прысутнічаюць у многіх сферах жыцця. А правільна састаўленыя дакументы – гарант спакою і надзейнасці.
Шматгадовая добрасумленная праца, узорнае выкананне ўскладзеных абавязкаў і высокія паказчыкі ў рабоце натарыуса Марыны Манько ў сувязі з Днём юрыста былі адзначаны Падзячным пісьмом райвыканкама.
Фота Максіма МІКЕШЫНА.