“З клопатам і цеплынёй сэрцаў”
Літаральна два тыдні засталося да надыходу самага любімага свята – Новага года. У гэты перыяд прадстаўнікі грамадскіх аб’яднанняў, калектываў арганізацый і прадпрыемстваў горада і раёна прымаюць актыўны ўдзел у дабрачынных акцыях і мерапрыемствах, віншуюць рабят з надыходзячымі навагоднімі і каляднымі святамі і дораць падарункі.
На бягучым тыдні стартавала дабрачынная раённая акцыя “З клопатам і цеплынёй сэрцаў”, наладжаная раённымі арганізацыямі ГА “Беларускі фонд міру” і “Белая Русь”, раённым таварыствам ветэранаў. З падарункамі да выхаванцаў Цэнтра дадатковай адукацыі дзяцей і моладзі завіталі старшыні гэтых раённых арганізацый Вольга Гаршкова і Васіль Маркевіч, а таксама раённага таварыства ветэранаў Эма Карпук. Дзяўчынкі і хлопчыкі атрымалі для заняткаў спортам гімнастычныя мячы і блокі для йогі.
Як адзначыла Вольга Гаршкова, для набыцця спортінвентару былі выкарыстаны добраахвотныя ахвяраванні ў тым ліку і калектыву аддзела па адукацыі, спорту і турызму райвыканкама, які заўсёды актыўна ўдзельнічае ў зборы сродкаў на дабрачынныя мэты.
Эма Карпук перадала рабятам смачны пірог, каб яны пасля карысных для здароўя заняткаў спортам змаглі пасядзець за кубкам чаю. Дарэчы, менавіта 15 снежня, калі выхаванцы ЦДАДіМ атрымалі падарункі да навагодніх святаў, адзначаўся Міжнародны дзень чаю.
Словы ўдзячнасці ў гэты дзень адрасавалі прадстаўнікі раённых арганізацый ГА “Беларускі фонд міру” і “Белая Русь”, раённага таварыства ветэранаў і медыкам раёна, якія ў складаны эпідэміялагічны перыяд знаходзяцца на перадавой барацьбы з COVID-19.
Так, Фондам міру быў набыты гаспадарчы інвентар, дэзінфіцыруючыя сродкі для палат райбальніцы, дзе праходзяць лячэнне пацыенты з каранавіруснай інфекцыяй. У межах дабрачыннай раённай акцыі “З клопатам і цеплынёй сэрцаў” ад Фонду міру і “Белай Русі” медыцынскія работнікі атрымалі маскі і дэзрастворы.
Таксама раённымі арганізацыямі былі набыты і перададзены ў палаты для ветэранаў Вялікай Айчыннай вайны і працы тэлевізар, мікрахвалевая печ і кававарка. Прыемным сюрпрызам для медыкаў сталі і салодкасці: пірог, чай і шакалад.
Медыцынскія маскі і дэзінфіцыруючыя вадкасці былі перададзены работнікам санаторыя імя К.П.Арлоўскага, якія з іх дапамогай зробяць усё неабходнае, каб адпачынак наведвальнікаў установы быў бяспечным і карысным для здароўя. Атрымалі рассветаўцы і салодкі чайны набор.
Фота Людмілы СЯМЁНАВАЙ.
У цяперашні час у санаторыі імя К.П.Арлоўскага аздараўляюцца жыхары з розных куткоў Беларусі. Плануецца, што напярэдадні навагодніх і калядных святаў прыедуць паправіць здароўе суседзі-расіяне.
Усяго за 2020 год санаторна-курортнае лячэнне ў сценах рассветаўскай здраўніцы атрымалі госці з 16-ці краін свету, у тым ліку Украіны, Літвы, Эстоніі, Ірландыі і іншых.
Санаторна-курортнае лячэнне арганізавана па чатырох медыцынскіх профілях: хваробы касцёва-
мышачнай сістэмы і злучальнай тканіны; хваробы нервовай сістэмы; хваробы органаў стрававання і хваробы органаў дыхання.
Веды і вопыт медыцынскага персаналу і калектыву санаторыя, а таксама сучаснае абсталяванне дазваляюць на высокім узроўні праводзіць рэабілітацыю і аздараўленне людзей па вышэй адзначаных медыцынскіх профілях.
Калектыў санаторыя імя К.П.Арлоўскага заўсёды рады прымаць усіх жадаючых у сваіх сценах і аказваць ім неабходную дапамогу!