Жыццё ён прысвяціў Радзіме… 30 студзеня – 126 год з дня нараджэння Кірылы Арлоўскага
30 студзеня – чарговая гадавіна з дня нараджэння нашага земляка, легендарнага старшыні калгаса “Рассвет” Кірылы Пракопавіча Арлоўскага. Ён з’явіўся на свет у 1895 годзе ў мнагадзетнай сялянскай сям’і ў вёсцы Мышкавічы. За сваё жыццё прайшоў гераічны баявы і працоўны шлях.
Пасля Кастрычніцкай рэвалюцыі 1917 года і да заканчэння Вялікай Айчыннай вайны лёс К.П.Арлоўскага быў звязаны з разведкай, органамі УНК, НКУС і НКДБ. За граматна праведзеныя аперацыі разведвальна-дыверсійнай групы НКДБ “Сокалы” падчас Вялікай Айчыннай вайны падпалкоўнік дзяржбяспекі Кірыла Арлоўскі быў удастоены звання Героя Савецкага Саюза.
У ліпені 1944 года К.П.Арлоўскі падаў заяву на імя Сталіна з просьбай дазволіць яму ўзначаліць калгас на сваёй малой радзіме – у Мышкавічах і выдзеліць крэдытныя грашовыя сродкі на развіццё гаспадаркі. Яго зварот быў задаволены. Свае абяцанні К.П.Арлоўскі выканаў: праз некалькі год аб поспехах “Рассвета” даведаўся ўвесь былы Савецкі Саюз. За працоўныя дасягненні быў удастоены звання Героя Сацыялістычнай працы.
Кіраўчане свята шануюць памяць пра легендарнага земляка. У Мышкавіцкім СДК і СШ №2 імя К.П.Арлоўскага маюцца музеі К.П.Арлоўскага, дзе захоўваюцца яго асабістыя рэчы, архіўныя дакументы, фотаздымкі, інфармацыя пра яго баявыя і працоўныя подзвігі. Частыя госці ў музеях – школьнікі. Рабяты заўсёды з задавальненнем слухаюць гісторыю складанага, але гераічнага жыцця Кірылы Пракопавіча, пра яго шчырую любоў да сваёй малой радзімы, да вяскоўцаў.
К.П.Арлоўскі стаў прататыпам героя ў мастацкім фільме “Старшыня”, дзе ярка раскрываецца тэма вяртання галоўнага героя стужкі ў родную вёску, каб аднавіць разбураную фашыстамі калгасную гаспадарку, яго неймаверным жаданні прынесці карысць сваёй Радзіме.
Лёс так распарадзіўся, што студзень стаў і апошнім месяцам яго жыцця: 13 студзеня 1968 года К.П.Арлоўскага не стала.