Сям’я Петрусёвых з Кіраўшчыны – у ліку лідараў абласнога этапу праекта “Уладар сяла-2021”
На абласным этапе рэспубліканскага сямейнага сельскагаспадарчага праекта “Уладар сяла-2001”, які прайшоў у аграгарадку Радамля Чавускага раёна, першынство аспрэчвала 11 сем’яў, якія сталі пераможцамі па выніках раённых этапаў.
У нашым раёне перамагла і атрымала права ўдзельнічаць у абласным этапе сям’я Петрусёвых з в.Пархімкавічы. Пра іх “Кіравец” расказваў сваім чытачам. Нагадаем, што галава сям’і Дзяніс працуе механізатарам у КСУП “Жылічы”, яго жонка Аксана знаходзіцца ў дэкрэтным водпуску па догляду дзіцяці – дачкі Міраславы. У іх ёсць падсобная гаспадарка, радуе ўраджаямі прысядзібны ўчастак. Маладая сям’я стараецца разнастаіць свой вольны час.
У ходзе абласнога этапу ўдзельнікі спаборнічалі ў 7 конкурсах: выкарысталі творчыя здольнасці ў паказе візітак, дэманстравалі свае ўменні ў распілоўцы дроў на хуткасць, распражэнні каня, гаспадары і гаспадыні мяняліся ролямі і паказвалі, як умеюць спраўляцца з адпаведнымі абавязкамі. Не абышлося і без смачнага конкурсу – фірменных сямейных страў, прыгатаваных з дароў уласнага агарода.
Нашы Петрусёвы дастойна прайшлі ўсе конкурсы і занялі па выніках абласнога этапу ганаровае 3 месца. Трэба асабліва адзначыць, што яны ўразілі ўсіх афармленнем свайго падвор’я.
На рэспубліканскі этап, які адбудзецца падчас свята “Купалле” (“Александрыя збірае сяброў”) у Шклоўскім раёне, паедзе сям’я Пагодзіных з Круглянскага раёна, заняўшая 1 месца.
Дарэчы, нагадаем, што летась пераможцай рэспубліканскага праекта “Уладар сяла” стала сям’я Фядотавых з Кіраўскага раёна. Сёлета ў нашых удзельнікаў – “бронза”, Кіраўшчына зноў у ліку лідараў. Малайцы, нашы маладыя вясковыя сем’і!
Фота Андрэя САЗОНАВА.