У гэты дзень у 1918 годзе на I Усерасійскім з’ездзе саюзаў рабочай і сялянскай моладзі быў утвораны Расійскі камуністычны саюз моладзі, які ў 1924 годзе стаў Ленінскім, а з 1926 года – Усесаюзным.
Камсамол – цэлая эпоха ў гісторыі. Для мільёнаў юнакоў і дзяўчат ён стаў сапраўднай школай жыцця, дзе сам час даваў урокі мужнасці, дабрыні і справядлівасці, вучыў дружбе і стойкасці, выхоўваў пачуццё адказнасці за ўсё, што адбываецца навокал.
Ва ўсе часіны пад сцягамі камсамола аб’ядноўваліся самыя актыўныя прадстаўнікі моладзі. Савецкая камсамольская арганізацыя за гады дзейнасці выхавала шмат герояў вайны і працы, славутых дзеячаў у розных галінах жыццядзейнасці, якія сваімі добрымі справамі дэманстравалі беззапаветную адданасць краіне і народу.
Школу камсамола прайшлі некалькі пакаленняў савецкіх лю­дзей, у тым ліку і нашы дзядулі з бабулямі, бацькі. Камсамольцы вылучаліся актыўнасцю, ініцыятыўнасцю, арыгінальнасцю, гэтыя якасці ўласцівыя прадстаўнікам старэйшага пакалення і зараз. Не словам, а справамі камсамольцы ўдзельнічалі ва ўзвядзенні новых гарадоў і аб’ектаў на прасторах усяго Савецкага Саюза, вялі за сабой грамадскасць.
Беларускі Рэспубліканскі Саюз Моладзі, як правапераемнік камсамола, захаваў лепшыя традыцыі савецкага маладзёжнага руху. Адна з іх – удзел юнакоў і дзяўчат у будатрадаўскім руху. Сучасныя школьнікі, студэнты займаюцца добраўпарадкаваннем, будаўнічымі, сельскагаспадарчымі і іншымі работамі. Гэтая добрая камсамольская традыцыя жыве і прымнажаецца, выхоўваючы ў падрастаючага пакалення павагу і любоў да працы, самадысцыплінаванасць і адказнасць.
Асноўныя ідэі, прынцыпы і задачы сучаснага маладзёжнага руху такія ж, як і ў былой камсамольскай арганізаці, – патрыятычнае і духоўна-маральнае выхаванне моладзі, садзейнічанне ўсебаковаму развіццю асобы маладога чалавека. І гэта лепшае, што пакінуў нам у спадчыну камсамол.
Ірына ПЯТРОЎСКАЯ, першы сакратар раённай арганізацыі ГА “БРСМ”.