Насустрач “Дажынкам-2021”: “Моладзь за ўраджай!”
Чацвёрты год запар у краіне, у тым ліку і нашым раёне, намаганнямі грамадскага аб’яднання “БРСМ” пры падтрымцы Міністэрства сельскай гаспадаркі і харчавання Рэспублікі Беларусь рэалізуецца праект “Моладзь за ўраджай!”. Гэта своеасаблівыя спаборніцтвы паміж камбайнерамі і вадзіцелямі ва ўзросце да 31 года, занятымі на жніве. Асноўная задача праекта – падтрымаць маладых працаўнікоў вёскі, папулярызаваць працу на зямлі і прафесіі аграпрамысловага комплексу.
Раман Шарамета
Як расказала першы сакратар РК ГА “БРСМ” Ірына Пятроўская, сёлета на Кіраўшчыне ва ўборачнай кампаніі былі задзейнічаны 11 маладзёжных экіпажаў – а гэта 21 механізатар і 3 маладыя вадзіцелі. 5 збожжаўборачных экіпажаў з ліку моладзі шчыравалі на сельгаспалетках ААТ “Рассвет імя К.П.Арлоўскага”: Андрэй і Сяргей Дразды, Юрый Асташоў і Аляксандр Савельеў, Максім Юркавец і Іван Калееў, Сяргей Рыдзеўскі і Эдуард Фамін, Аляксандр Пінчук і Данііл Кахновіч, а таксама маладыя вадзіцелі, якія адвозілі ад камбайнаў свежанамалочанае збожжа, – Павел Андросаў і Яўген Шабуневіч.
У калектыве жыліцкіх хлебаробаў у жніве ўдзельнічалі маладыя механізатары Сяргей Міхнёў, Дзяніс Петрусёў і Аляксей Грыбоўскі, а таксама малады вадзіцель Раман Шарамета.
Па адным маладзёжным уборачным экіпажы было ў ААТ “Дабаснянскае” – у саставе Яўгена Максімава і Аляксея Хвясько, КСУП “Ніва-Барсукі” – Андрэя Свірко і Аляксея Бяляўскага, КСУП “Чырвоны баец” – Дзяніса Казанцава і Дзмітрыя Цяніцкага, СВК “Бераснёўскі” – Паўла Іванова і Яўгена Міхалапа.
Яўген Міхалап
Падчас уборачнай кампаніі наладжвалася ўшанаванне перадавікоў сярод моладзі, якія першымі намалацілі альбо перавезлі тысячу і больш тон збожжа.
Прама на сельгаспалеткі да іх завітвалі прадстаўнікі раённай улады, актывісты БРСМ, прафсаюзнай арганізацыі, каб падзякаваць за адказную працу і ўручыць дыпломы і вымпелы лідараў жніва, падарункі.
Па выніках раённага спаборніцтва за дасягненне высокіх паказчыкаў на ўборцы ўраджаю збожжавых і зернебабовых раслін за 2021 год пераможцамі ў намінацыі “Сярод старшых камбайнераў і камбайнераў маладзёжных экіпажаў збожжаўборачных камбайнаў” сталі рассветаўцы Андрэй і Сяргей Дразды. Хлопцы праславілі раён у маштабах рэспублікі – сталі лідарамі рэспубліканскага праекта “Моладзь за ўраджай” у намінацыі “Маладзёжны экіпаж, дасягнуўшы найбольшага намалоту”.
2 месца ў раённым спаборніцтве заняў маладзёжны экіпаж у саставе Максіма Юркаўца і Івана Калеева, 3 – Юрый Асташоў.
Абсалютным лідарам сярод маладых вадзіцеляў стаў Раман Шарамета з Жыліч (на здымку 1). Ён першым у раёне сярод вадзіцеляў ва ўзросце да 31 года перавёз ад камбайнаў 1000 тон збожжа. Летась Раман заняў 3 месца ў адпаведным спаборніцтве. Падчас сёлетняга жніва ягоных намаганняў і шчырага імкнення зрабіць даручаную справу як мага лепей хапіла для перамогі.
Родам Раман Шарамета з Жыліч. Пасля заканчэння мясцовай школы паступіў у Жыліцкі сельгаскаледж, а затым, пасля авалодання азамі сельскагаспадарчай прафесіі, пайшоў служыць у армію. Вадзіцелем у КСУП “Жылічы” працаўладкаваўся ў 2020 годзе. Да гэтага паспрабаваў шмат прафесій, але ж вырашыў знайсці сваё месца менавіта на малой радзіме. Раман падзяліўся, што прыказка “дзе нарадзіўся, там і спатрэбіўся” сапраўды адпавядае свайму сэнсу. Жыццё і праца ў знаёмых абставінах, побач з блізкімі людзьмі, сябрамі прыносяць сваю карысць. Працай малады чалавек задаволены, а ўдзел і перамогі ў вытворчых спаборнітцвах з’яўляюцца стымулам для далейшых дасягненняў.
Яўген Шабуневіч
Сярод маладых вадзіцеляў на 2 і 3 месцах у раённым спаборніцтве адпаведна – Яўген Шабуневіч (на здымку 2) і Яўген Міхалап (на здымку 3).
З года ў год, з пакалення ў пакаленне на Кіраўшчыне перадаюцца слаўныя працоўныя традыцыі: вопытныя аграрыі дапамагаюць моладзі асвойваць нялёгкую прафесію земляроба. А маладыя механізатары, у сваю чаргу, вылучаюцца стараннасцю і адказнасцю, што пацвярджае факт іх яскравых працоўных дасягненняў.
Яўгенія БЯЛЬКО.