Вынік працы настаўніка — поспех яго вучняў
Прафесійнае свята — гэта прызнанне заслуг людзей, што працуюць у гэтай сферы. Калі ж размова ідзе пра настаўнікаў, то неабходна сказаць, што толькі моцныя духам могуць ісці ў нагу з часам і з маладым пакаленнем. Не патрабуе доказу і тая аксіёма, што ў руках настаўнікаў — будучае. Менавіта настаўнікі закладваюць у сваіх вучняў той фундамент ведаў, які дапамагае ім жыць, працаваць, марыць.
У гімназіі працуе вопытны, высокакваліфікаваны педагагічны калектыў. Сярод іх вылучаецца настаўнік інфарматыкі Алена Мікалаеўна Жлобіч, граматны, улюбёны ў сваю справу педагог. Уводзіць дзяцей у камп’ютарны свет Алена Мікалаеўна пачала ў 1989 годзе, калі ў школах нашага раёна не было яшчэ не тое што камп’ютарных класаў, а нават асобных камп’ютараў. Таму пачала настаўніца сваю працоўную дзейнасць на Кіраўшчыне ў міжшкольным кабінеце інфарматыкі пры Доме піянераў, куды на заняткі прыязджалі дзеці з розных школ раёна. Са з’яўленнем у 1997 годзе камп’ютарнага класа ў СШ №2 імя К.П.Арлоўскага А.М.Жлобіч стала працаваць у школе.
Аб выніках працы настаўніка красамоўна гавораць поспехі яго вучняў. Алене Мікалаеўне ёсць кім і чым ганарыцца. На рахунку дасягненняў яе вучняў — перамогі ў раённых, абласных і рэспубліканскіх этапах прадметных алімпіяд па інфарматыцы.
Асаблівы гонар настаўніка — яе сын і былы вучань Андрэй, які за ўдзел у прадметных алімпіядах у розныя гады быў узнагароджаны граматамі абласнога і рэспубліканскага ўзроўняў, на абласным этапе заваяваў дыплом ІІ ступені, двойчы станавіўся пераможцам. У капілцы яго ўзнагарод — дыпломы ІІ і ІІІ ступеняў рэспубліканскага этапу алімпіяд па інфарматыцы. Інтарэс да прадмета прадвызначыў і прафесійнае будучае Андрэя. Пасля заканчэння БДУІР ён працуе праграмістам.
З развіццём камп’ютарных тэхналогій з кожным годам усё складаней становіцца дасягаць найвышэйшых паказчыкаў па прадмеце, але ж у вучняў А.М. Жлобіч гэта атрымліваецца. Цяперашні адзінаццацікласнік Віктар Іваніцкі летась заваяваў дыплом ІІІ ступені на абласным этапе рэспубліканскай алімпіяды па інфарматыцы.
Працоўныя заслугі А.М. Жлобіч адзначаны граматамі аддзела адукацыі райвыканкама, абласнога ўпраўлення адукацыі, граматай Міністэрства адукацыі.
Галіна РУСЕЦКАЯ,
намеснік дырэктара гімназіі
па выхаваўчай рабоце.