Святочным шэсцем — па галоўнай вуліцы
Хоць снежаньскае надвор’е не радуе сняжком і марозцам, і падобна хутчэй на веснавое, набліжэнне Новага года адчуваецца ўсё больш і больш: па святочных акцыях і іншых мерапрыемствах, адпаведным чынам прыбраных будынках і, у першую чаргу, галоўнай плошчы горада, у цэнтры якой сваё пачэснае месца заняла прыгажуня-ёлка. Тут у мінулую пятніцу, па традыцыі, быў дадзены старт раённым навагоднім мерапрыемствам. Галоўны Дзед Мароз здаў рапарт аб гатоўнасці да свята старшыні райвыканкама Уладзіміру Піскіжаву. А побач выстраілася калона Дзедаў Марозаў і Снягурак разам з казачнымі персанажамі, якая маляўнічым шэсцем прайшла ад раённага Дома культуры да плошчы пад музыку духавога аркестра “Фанфары Кіраўска”. Тут сабралася нямала кіраўчан, школьнікаў, выхаванцаў дзіцячых садкоў, каб паназіраць за гэтым відовішчам, якое адбываецца толькі раз у годзе.
Кіраўнік раёна выказаў словы навагодніх віншаванняў і пажаданняў усім прысутным і даў старт навагодняму марафону.
У святочным шэсці прыняло ўдзел дваццаць каманд асноўных герояў навагодняга свята — з ПМК-255, РАПТЗ, ААТ “Кіраўск-лён”, цэнтральнай раённай бальніцы, ПМК-97 “Вадгас”, райспажыўтаварыства, ДРБУ-197, СШ №1 і гімназіі, дзіцячай бібліятэкі, дзіцячай школы мастацтваў, кінавідэапрадпрыемства, устаноў культуры раёна.
Захапляльнае тэатралізаванае прадстаўленне паказала гледачам ад імя ўсёй навагодняй працэсіі каманда цэнтральнай раённай бальніцы. Затым былі запалены агеньчыкі на навагодняй ёлцы, і ўсе дружна кружыліся ў карагодзе. А потым калона Дзедаў Марозаў, Снягурак і казачных герояў рушыла па вуліцы Кірава, дорачы ўсім святочны настрой.
Фота Максіма МІКЕШЫНА.