Пайшла Каляда, калядуючы…
Напярэдадні старога Новага года мы вырашылі ў нашай вёсцы Пацава Слабада ажыццявіць абрад калядавання. Актыўны ўдзел у гэтым прыняла мясцовая дзятва.
Усе касцюмы і атрыбуты абрада былі загадзя пашыты і выраблены сваімі рукамі, што выклікала асаблівы інтарэс у хлопчыкаў і дзяўчынак. Пры падрыхтоўцы касцюмаў у ход ішло ўсё, нават старажытныя рэчы з бабуліных куфэркаў, плюс выдумка і майстэрства — і вынік атрымаўся цудоўным!
Калядоўшчыкі заходзілі ў кожны дом, віншавалі гаспадароў з Калядамі, жадалі ім здароўя, багацця, дабра.
Уперадзе неслі выяву Віфліемскай зоркі, ролю Звездара выканаў Мікалай Говар. З роллю Казы, якую калядоўшчыкі бралі з сабой, як сімвал дастатку, выдатна справілася Ксенія Храмовіч, з роллю Каня — сімвала здароўя, працавітасці і сілы, — Коля Макаранка, Павадыра — Крысціна Новікава, Механошы, збіраючага гасцінцы ў мех — Ваня Русецкі. У калядаванні прынялі ўдзел цыганкі, якія прыносілі ў дамы сяльчан радасць і весялосць, — іх увасобілі Саша Шыдлоўская, Таня Кейзік.
Людзі здаўна вераць, што прыход Каляды — гэта шчасце, здароўе і дабрабыт на ўвесь год, таму ў знак удзячнасці за добрыя пажаданні частавалі калядоўшчыкаў рознымі прысмакамі.
Анжэліка РУСЕЦКАЯ,
дырэктар Пацава-Слабадскога СДК.