Набліжаецца 23 сакавіка —дзень выбараў у мясцовыя Саветы дэпутатаў дваццаць сёмага склікання. На бягучым тыдні з 18 па 22 сакавіка ўключна праводзіцца датэрміновае галасаванне. Гэтай магчымасцю скарысталіся многія кіраўчане і жыхары раёна.

У першы дзень датэрміновага галасавання карэспандэнты раённай газеты пабывалі на Жыліцкім участку для галасавання №17 па выбарах дэпутатаў мясцовых Саветаў дэпутатаў Рэспублікі Беларусь дваццаць сёмага склікання, размешчаным у Жыліцкім сельгаскаледжы. Прыехаўшы сюды праз гадзіну пасля адкрыцця ўчастка, мы ўбачылі вялікую групу юнакоў і дзяўчат, якія вырашылі выкарыстаць магчымасць прагаласаваць датэрмінова. Маладым людзям, якія сёлета ўпершыню прымаюць удзел у выбарах, не цярпелася хутчэй адчуць усю значнасць гэтай падзеі.
З пашпартамі ў руках навучэнцы чакалі сваёй чаргі, каб аддаць голас за таго ці іншага кандыдата ў дэпутаты.
Як паведаміла старшыня ўчастковай выбарчай камісіі Людміла Шмялёва, у спісе выбаршчыкаў Жыліцкага ўчастка для галасавання №17 — 1009 чалавек, з іх — 200 навучэнцаў сельгаскаледжа, 126 з якіх сёлета ўпершыню прымаюць удзел у выбарах. Зразумела, гэта не толькі важная падзея ў жыцці, але і хвалюючая. Людміла Мікалаеўна запэўніла, што рабятам хвалявацца не трэба, члены ўчастковай выбарчай камісіі пры неабходнасці дапамогуць, дадуць адказы на цікавячыя маладых выбаршчыкаў пытанні. Папярэдне навучэнцы былі азнаёмлены з буклетамі аб кандыдатах у дэпутаты мясцовых Саветаў дэпутатаў, парадкам правядзення галасавання, тым, як запаўняць бюлетэні.

Да ўвагі выбаршчыкаў таксама — стэнд, дзе змешчана ўся неабходная інфармацыя. Дарэчы, стэнд ёсць і ў ін- тэрнатах, сельскім Доме культуры.
Мы запыталіся ў навучэнцаў сельгаскаледжа, якія ўпершыню прымалі ўдзел у галасаванні, што значыць для іх гэтая падзея, і якім, на іх погляд, павінен быць дэпутат.
Вольга Мініна:
— Сённяшні дзень, безумоўна, застанецца назаўсёды ў маёй памяці. Без падманнай сціпласці скажу, што было вельмі хвалююча: мой жа голас можа стаць рашаючым! Гэта вялікая адказнасць!
Прыемна было атрымаць памятныя сувеніры, якія нам уручылі ў гонар таго, што мы ўпершыню прынялі ўдзел у выбарах.
Лічу, што дэпутат, у першую чаргу, павінен быць адказным чалавекам, якому можна давяраць, да якога можна пры неабходнасці звярнуцца за дапамогай. І праблемы выбаршчыкаў, не адкладаючы ў доўгую скрыню, ён павінен вырашаць своечасова. А ўвогуле, калі чалавек на асноўным месцы работы адказна выконвае ўскладзеныя на яго абавязкі, карыстаецца аўтарытэтам у калег або падначаленых, значыць, і дэпутацкія абавязкі будзе выконваць паспяхова.
Валерыя Шостак:
— Я лічу, што дэпутат павінен быць сумленным, адкрытым, адказным, а галоўнае — гаспадаром свайго слова. Ён павінен разумець, што на яго ўскладзена вялікая адказнасць перад сваімі выбаршчыкамі, і таму яго дзеянні павінны быць накіраваны на карысць народа.
Разумеючы значнасць выбараў у мясцовыя Саветы дэпутатаў, я прыйшла ў першы дзень датэрміновага галасавання на выбарчы ўчастак і прагаласавала. Зразумела, гэты дзень запомніцца мне на ўсё жыццё!
Як бачна, моладзь праяўляе актыўнасць у выбарчай кампаніі. Як прызналіся рабяты, ім прыемна браць на сябе высокую адказнасць за фарміраванне органаў мясцовага самакіравання, ад дзейнасці якіх многае залежыць у жыцці рэгіёна. А іх удзел у выбарах стане паказчыкам грамадзянскай сталасці і самастойнай палітычнай пазіцыі.
Як адзначыла на развітанне старшыня ўчастковай камісіі Людміла Шмялёва, мяркуецца, што выбары на іх участку для галасавання пройдуць, як заўжды, арганізавана і на высокім узроўні.

На здымку: упершыню галасуюць навучэнкі 31 “У” групы Анастасія Цыркунова і Марыя Трошка.

Анастасія БЕГУНОВІЧ.
Фота
Максіма МІКЕШЫНА.