Жыллё з падтрымкай дзяржавы
У адпаведнасці з арт. 48 Канстытуцыі Рэспублікі Беларусь кожны грамадзянін мае права на жыллё. Грамадзянам, маючым патрэбу ў сацыяльнай абароне, жыллё прадастаўляецца дзяржавай і мясцовым самакіраваннем бязвыплатна ці па даступнай для іх аплаце ў адпаведнасці з заканадаўствам.
Трэба адзначыць, што ў нашай дзяржаве аказваецца адчувальная падтрымка мнагадзетным сем’ям. Яны маюць права на выкарыстанне льготнага крэдыту і аднаразовай бязвыплатнай субсідыі на будаўніцтва або набыццё жылых памяшканняў.
Менавіта такім правам і скарысталася мнагадзетная сям’я Наталлі і Станіслава Хвясько з а/г Добасна. Напрыканцы мінулага года яны атрымалі ключы ад новай трохпакаёвай кватэры ў жылым доме СЖБК-8 у г.Кіраўску. Дарэчы, у гэтым доме атрымалі жыллё 18 мнагадзетных сем’яў.
У сям’і Хвясько гадуецца пяцёра дзетак: старэйшы Аляксей ужо адслужыў у арміі, плануе звязаць свой лёс з работай у міліцыі, Лілія атрымлівае спецыяльнасць бібліёграфа ў БДУ, Юра і Антон яшчэ школьнікі, а самай маленькай — любіміцы сям’і Палінкі ўсяго два з паловай года.
Як адзначыла ў размове Наталля Іванаўна, атрыманне кватэры для іх, можна сказаць, падарунак ад дзяржавы. Іх сям’і давядзецца вяртаць толькі 25% ад сумы выдадзенага крэдыта на працягу 40 гадоў.
Мінулы год для сям’і Хвясько быў адзначаны яшчэ адной прыемнай і знакавай падзеяй. У адпаведнасці з Указам Прэзідэнта Рэспублікі Беларусь А.Р.Лукашэнкі Наталля Хвясько была ўзнагароджана ордэнам Маці.