Збажына цячэ ў засекі залатой ракой…
Гарачая зараз пара ў хлебаробаў СВК “Рассвет” імя К.П.Арлоўскага, бо збожжавы клін гэтай гаспадаркі — адзін з самых вялікіх у раёне. Сёлета збожжавыя і зернебабовыя культуры займаюць тут плошчу ў 3623 га. Каб хутка і без страт убраць вырашчаны ўраджай, усе, хто заняты на жніве, даражаць кожнай хвілінай сонечнага надвор’я, якое, на радасць, усталявалася ў гэтыя дні.
Напрыканцы мінулага тыдня рассветаўцы ўбіралі ва ўрочышчы “Кірава” азімую пшаніцу, якая раскінулася на плошчы ў 233 га. Праліўныя дажджы і моцныя ветры значна пашкодзілі гэтую культуру, амаль палова пшаніцы была “прыбіта” да зямлі. Шчыра кажучы, не верылася, што на гэтым участку камбайнеры змогуць убраць хлеб без страт. Але пераканацца ў іншым давялося на свае вочы. Магутныя машыны з лёгкасцю ўздымалі важкія каласы пшаніцы, і роўненька зразаючы, захоплівалі ў жатку: на зямлі не заставалася ніводнага зярнятка. Пацвярджэннем таму і ўраджайнасць, якая, як гаворыцца, “зашкальвала”, на круг выходзіла ў сярэднім па 64 ц/га.
Як адзначыў начальнік участка “Кірава” Ігар Шчэрбіч, высокаму ўраджаю паспрыялі многія фактары: гэта і падбор якаснага насення, і выбар папярэднікаў у палях севазвароту, і за- хоўванне тэхналогіі вырошчвання культур, і своечасовая апрацоўка іх ад пустазелля і шкоднікаў, і дастатковая колькасць угнаенняў.
На ўборцы збожжавых занята зараз 12 камбайнаў. Кіруюць імі вопытныя і адказныя механізатары, але ёсць і моладзь, якая вучыцца ў старэйшых таварышаў майстэрству, бярэ прыклад руплівай працы. Лідарства сярод камбайнераў утрымлівае сямейны экіпаж у саставе Мікалая Белакурскага і яго сына Сяргея, на іх рахунку па стане на ўчарашні дзень 1275,4 тон намалочанага збожжа. Для Мікалая Іванавіча гэта 16-е жніво, сапраўдную цану хлебу ён ведае — не раз займаў першыя месцы ў раённым спаборніцтве. І Сяргей яму да пары — старанны, кемлівы, адказны юнак. Упершыню Сяргей сеў у кабіну камбайна ў 13-гадовым узросце, працаваў у якасці памочніка.
Па словах Мікалая Белакурскага, убіраць такі ўраджай вельмі радасна і прыемна: адзін круг па полі, і бункер зноў напаўняецца залацістым збожжам.
Да слова, на сёлетнім жніве ў гаспадарцы шчыруюць, акрамя Белакурскіх, яшчэ тры сямейныя экіпажы: Аляксандр і Людміла Бяляўскія, Мікалай і Андрэй Дразды, Віктар і Сяргей Віліўчанкі, усе яны ўжо перакрочылі тысячны рубеж па намалотах.
На адвозцы збожжа задзейнічаны 9 аўтамабіляў. Ёсць свае тысячнікі і паўтаратысячнікі і сярод вадзіцеляў. Найлепшы вынік у Віктара Маковіча, які на ўчарашні дзень перавёз 1585,3 т збожжа, у спіну яму “дыхае” Генадзь Гукаў, на рахунку якога 1562,2 т. Тысячны рубеж на адвозцы збожжа перакрочылі Анатоль Сураўёў, Іван Барысёнак і Аляксандр Бабіч.
Як гаворыцца, не той хлеб, што ў полі, а той, што ў засеках. Немалаважным ланцужком ва ўборачнай кампаніі з’яўляецца работа ачышчальна-сушыльнай гаспадаркі. Давесці збожжа да неабходнай кандыцыі — справа адказная, таму і адносіны да яе ў аператараў адпаведныя. Пад кіраўніцтвам звеннявых Сяргея Каранкевіча і Віктара Еўдакімава па стане на ўчарашні дзень на сушыльных агрэгатах перапрацавана 5670,2 т збожжа.
…З першага ўбранага гектара і да апошняга каласка ўдзельнікі ўборачнай кампаніі знаходзяцца ў пастаянным напружанні. Яны ведаюць сапраўдную цану хлебу і разумеюць, што дапусціць страт ураджаю нельга!
Людміла СЯМЁНАВА.
Фота Максіма МІКЕШЫНА.