Ва ўсіх навучальных установах раёна 1 верасня адбудуцца ўрачыстыя лінейкі, на якіх у цэнтры ўвагі будуць вучні і настаўнікі: рознакаляровыя кветкі, віншаванні — менавіта для іх. Традыцыйныя для гэтага дня першы званок, сустрэчы з аднакласнікамі і агульны для ўсіх урок “Спасибо солдатам Победы за то, что не знаем войны”.
З пачаткам новага навучальнага года педагогаў і рабят (сёлета ва ўсіх навучальных установах раёна налічваецца 2070 вучняў) прыдуць павіншаваць прадстаўнікі райвыканкама, дэпутаты, кіраўнікі арганізацый, прадпрыемстваў, бацькі.
Асаблівая ўвага ў Дзень ведаў будзе нададзена першакласнікам, для якіх з гэтага дня расчыняюцца дзверы ў школьнае жыццё. Дарэчы, за парты сёлета сядзе 191 вучань першых класаў.
Для 108 адзінаццацікласнікаў новы навучальны год стане апошнім у сценах родных школ, ім неабходна прыкласці шмат намаганняў, каб паспяхова закончыць навучанне і вызначыцца з выбарам прафесіі.
Сваю працоўную дзейнасць на ніве адукацыі ў гэтым годзе пачнуць 6 маладых спецыялістаў, якія па размеркаванні прыехалі на Кіраўшчыну.
Сёння ў дзіцячай школе мастацтваў сабраліся педагогі з усіх навучальных устаноў раёна на штогадовую канферэнцыю, галоўная тэма якой — “Развіццё сістэмы адукацыі Кіраўскага раёна: ад умоў да выніку”. Больш падрабязна аб гэтым чытайце ў бліжэйшых нумарах “Кіраўца”.
Для сям’і Вараб’ёвых з райцэнтра сёлетні год адметны — іх дачушка Інга пойдзе ў першы клас. Каб вучаніца мела ўсё неабходнае для будучых заняткаў, бацькі падрыхтаваліся загадзя: набылі школьныя прылады, канцтавары. Таксама падабралі па густу абутак, адзенне — за яго прымеркай мы і заспелі будучую школьніцу разам з мамай Вольгай Іванаўнай, зрабілі фота на памяць.