7 верасня — Дзень беларускага пісьменства
Дзень беларускага пісьменства — нацыянальнае свята, якое адзначаецца штогод у першую нядзелю верасня. У аснову яго канцэпцыі пакладзена ідэя прапаганды здабытку айчыннай пісьмовай культуры, пераемнасці духоўных традыцый Беларусі. Свята дае ўнікальную магчымасць сустрэцца з жывым словам, удзельнікамі творчага працэсу стварэння кніг, газет і часопісаў.
Невыпадкова і тое, што Дзень беларускага пісьменства праводзіцца ў першыя дні новага навучальнага года. Адукацыя, інфармацыя і культура — тры галіны, якія фармуюць інтэлектуальную эліту нацыі, яе сучаснасць і будучыню. У гэты дзень мы аддаем даніну павагі нашым продкам, якія стварылі фундамент беларускай адукацыі і пісьменства.
Традыцыйна свята праводзіцца ў гарадах, якія з’яўляюцца гістарычнымі цэнтрамі культуры, навукі, літаратуры і кнігадрукавання.
Сёлетні, XXI Дзень беларускага пісьменства пройдзе 6-7 верасня ў г.Заслаўлі Мінскай вобласці. У межах свята ўдзельнікі і госці змогуць азнаёміцца з новымі кніжнымі выданнямі, сустрэцца з беларускімі і замежнымі літаратарамі, журналістамі, выдаўцамі, паслухаць выступленні паэтаў і пісьменнікаў, творчых калектываў і выканаўцаў.
Школьнікі Кіраўшчыны шчыра шануюць родную спадчыну, з павагай ставяцца да беларускай мовы, з цікавасцю вывучаюць яе.
Плённа праходзяць заняткі ў кабінеце беларускай мовы і літаратуры Паўлавіцкай СШ, якія вядзе настаўніца С.Л.Рыняк (на здымку). У гэтай установе адукацыі яна працуе 20 год, прывіваючы рабятам любоў да матчынай мовы. І гэта дае адчувальныя вынікі. Напрыклад, адзін з яе вучняў Кірыл Галанцоў на цэнтралізаваным тэсціраванні па беларускай мове чатыры гады назад набраў 95 балаў — гэта быў лепшы вынік у раёне. А васьмікласніца Дарына Юхноўская ў мінулым навучальным годзе стала пераможцай раённай алімпіяды.
Фота
Максіма МІКЕШЫНА.