“Цуды на Ражство”
Каб падарыць усім дзецям у нашай краіне чараўніцтва навагодняга свята, праводзіцца дабрачынная акцыя “Нашы дзеці”.
З гэтай нагоды актывісты раённай арганізацыі ГА “БРСМ” наладзілі акцыю “Цуды на Ражство” і загадзя аб’явілі аб зборы падарункаў для дзяцей з мнагадзетных, няпоўных, малазабяспечаных сем’яў, дзяцей-сірот і дзяцей-інвалідаў. Жыхары раёна актыўна далучыліся да гэтай дабрачыннай справы, каб ніводны хлопчык і дзяўчынка з 33 такіх сем’яў не засталіся без падарункаў — яны прадаставілі цацкі, канцылярскія тавары, салодкасці.
Не засталіся ў баку і раённыя арганізацыі грамадскіх аб’яднанняў “Белая Русь”, “Беларускі фонд міру”, а таксама індывідуальныя прадпрымальнікі Вольга Іваніцкая і Юрый Каранкевіч: усе яны прадаставілі важкія салодкія наборы.
Напярэдадні навагодніх святаў прадстаўнікі грамадскіх аб’яднанняў разам з Дедам Марозам і Снягуркай пачалі аб’езд рабят (а наведацца ім неабходна да 71 дзіцяці). Хлопчыкі і дзяўчынкі з радасцю сустракалі гасцей, чыталі ім вершы, спявалі песні.
Падарункі ўжо ўручаны маленькім жыхарам населеных пунктаў Мышкавіцкага і Дабаснянскага сельсаветаў. Дзед Мароз са Снягуркай працягнуць свае візіты да рабят іншых вёсак.
На здымку: старшыні раённых арганізацый ГА “Беларускі фонд міру” Вольга Гаршкова і ГА “БРСМ” Алена Осіпава, старшыня Мышкавіцкага сельскага Савета дэпутатаў Віталь Глекаў падчас уручэння падарункаў.