“Мінута славы на Кіраўшчыне”
У бягучым снежні аматараў папулярнай тэлеперадачы “Мінута славы” — шоў талентаў чакаў прыемны сюрпрыз: другі год запар аддзел ідэалагічнай работы, культуры і па справах моладзі райвыканкама наладжвае аднайменнае шоў мясцовага фармату, а значыць у жыхароў раёна ёсць магчымасць апынуцца ў атмасферы творчага спаборніцтва не з боку экранаў тэлевізараў, а насамрэч. Ну, а ўладальнікі талентаў, творчых і неардынарных здольнасцей маюць магчымасць паспрачацца за званне лепшага.
У пачатку зімы ў раённым Доме культуры прайшоў закрыты адборачны тур творчага конкурсу. На суд кампетэнтнага журы, начале якога — начальнік аддзела ідэалагічнай работы, культуры і па справах моладзі райвыканкама Андрэй Карпук, было прадстаўлена больш за 30 творчых нумароў. Аднак, згодна правілаў папулярнага тэлешоў у фінал раённага конкурсу “Мінута славы на Кіраўшчыне” выйшла 18 чалавек.
Фінал творчага спаборніцтва атрымаўся яскравым. Ад сузор’я талентаў, творчасці, шчырасці і адкрытасці канкурсантаў, здавалася, гледачам стала і святлей, і цяплей на душы. Хлопчыкі і дзяўчынкі, юнакі і дзяўчаты, маладыя людзі — а па правілах удзельнічаць у конкурсе маглі грамадзяне ва ўзросце ад 7 да 35 год, недзе здзівілі, недзе парадавалі, недзе ўразілі арыгінальнасцю, выдатнымі вакальнымі дадзенымі, пластычнасцю.
Дзіцячай шчырасцю і адкрытасцю ўзялі ў палон самыя маленькія ўдзельнікі: Іван Цяшаеў, які выразна прачытаў верш; Павел Новікаў — артыстычным выкананнем песні “Тата купіў аўтамабіль”; Аня Канцавая з песняй “А я закахалася ў кракадзіла”; дуэт Віталіны Дзяшковіч і Аляксандры Ціханавай з песняй пра школьных сябровак; Віялета Халатава з песняй “Вясёлка жаданняў”; квартэт “Вясёлыя рабяты” з незвычайным мульціпапуры; Алёна Грабнёва з песняй пра зіму; Ганна Кузняцова з заўзятай песняй “Гарманіст Цімошка”, Даша Навіцкая з песняй “На дэсерт”; Данііл Рублеўскі з песняй “Падаюць сняжынкі”.
У маляўнічы, гарачы і багаты на пачуцці ўсход гледачоў шоў перанеслі Крысціна Перадня з Жыліцкага сельгаскаледжа і Гульнара Барадзіна — юрыст ПМК-255. Крысціна — песняй на ўсходнія матывы “Не кажы”, а Гульнара — заварожваючым танцам “Гарачы Багдад”.
Парадаваў дуэт акардыяністаў Тэоны Бебурынай і Мацвея Пашкоўскага не толькі выдатна выкананай інструментальнай кампазіцыяй “Ціка-ціка”, але і сваёй шчырасцю і адкрытасцю.
У чарговы раз удзельніцы студыі стылю і моды “Гламур” далі магчымасць гледачам палюбавацца раскошай і вытанчанасцю, прадэманстраваўшы калекцыю жаночага адзення “Admiration”.
Асаблівай увагі заслугоўвае Яўген Рышкевіч — настаўнік Паўлавіцкай СШ, які выступаў у намінацыі “Аўтарская песня”. Малады чалавек у вольны час піша песні на беларускай мове і выконвае іх пад гітару, а таксама займаецца перакладам кампазіцый з замежных моў на родную. Яўген прадставіў на суд журы песню “Мае абшары”, якую склаў разам з братам Максімам.
Любові да роднага краю прысвяціла свой творчы нумар і Ганна Мурашка — выканала песню “Краіна мая, Беларусь!”.
Заварожвалі харэаграфічным талентам дзяўчаты з танцавальнага гуртка “KerpiDance”. А ў пластычнасці не было роўных Настассі Гусевай.
Пасля паўгадзіны разважанняў журы прыступіла да кульмінацыі фіналу творчага конкурсу “Мінута славы на Кіраўшчыне” — узнагароджвання. Дыпломамі конкурсу адзначаны Аня Канцавая, Аня Кузняцова, квартэт “Вясёлыя рабяты”, Даша Навіцкая, Крысціна Перадня і Алёна Грабнёва. Пераможцам у намінацыі “Аўтарская песня” стаў Яўген Рышкевіч. Віялета Халатава ад-значана журы дыпломам за індывідуальнасць і ўменне паказаць сябе. Лепшай у намінацыі “Эстрадны вакал” стала Ганна Мурашка. Пераможца намінацыі “Арыгінальны жанр” — студыя стылю і моды “Гламур”. Тэона Бебурына і Матвей Пашкоўскі — лепшыя ў намінацыі “Выкананне на музычных інструментах”. Другі год запар лідарства ў намінацыі “Харэаграфія” трымае Гульнара Барадзіна.
Усе ўдзельнікі і пераможцы атрымалі дыпломы і падарункі ад арганізатараў раённага конкурсу і РА ГА “Белая Русь”, якую прадстаўляў яе старшыня Васіль Маркевіч.
Атмасфера творчага спаборніцтва стала падставай для ячшэ адной прыемнай падзеі: Андрэй Карпук агучыў імёны пераможцаў конкурсу фотаработ, прысвечанага 80-годдзю ўтварэння Кіраўскага раёна, “Люблю цябе, мой родны край!”. Дыпломамі і прызамі былі ўзнагароджаны Яўгенія Маслава, Карына Якімчанка, а таксама фотакарэспандэнт раённай газеты “Кіравец” Максім Мікешын.
Фінальным акордам “Мінуты славы на Кіраўшчыне” стаў агульны фотаздымак удзельнікаў і членаў журы.
Яўгенія БЯЛЬКО.
Фота
Максіма МІКЕШЫНА.