На прынцыпах партнёрства і даверу

_MG_9100

Напярэдадні Дня банкаўскіх і фінансавых работнікаў мы сустрэліся з дырэктарам Цэнтра банкаўскіх паслуг №709 ААТ “ААБ Беларусбанк” Аленай ЛЯВІЦКАЙ і папрасілі яе расказаць аб дзейнасці ўзначальваемага ёю калектыву:

— На сённяшні дзень ААТ “ААБ Беларусбанк” — адзін з лідараў банкаўскай сістэмы Беларусі. Сярод асноўных накірункаў яго работы — аказанне шырокага спектра паслуг, падтрымка рэальнага сектара эканомікі, садзейнічанне ў рэалізацыі важных для народнай гаспадаркі інвестыцыйных праектаў.
Сетка Цэнтра банкаўскіх паслуг №709 ААТ “ААБ Беларусбанк” на тэрыторыі раёна прадстаўлена гарадскім аддзяленнем і 5 сельскімі.
Насельніцтву прапануем разнастайны пералік паслуг: дэпазітныя аперацыі, страхавыя паслугі, міжнародныя і ўнутрырэспубліканскія пераводы, аперацыі з пластыкавымі карткамі, валютна-абменныя аперацыі, прыём плацяжоў і інш.
На працягу многіх гадоў ЦБП №709 прымае ўдзел у рэалізацыі дзяржаўнай праграмы па будаўніцтве жылля для грамадзян, якія маюць патрэбу ў паляпшэнні жыллёвых умоў, з прыцягненнем ільготных крэдытаў. У бягучым годзе ў эксплуатацыю ўведзены 60-кватэрны дом па вул.Арлоўскага: грамадзяне скарысталіся падтрымкай дзяржавы і пабудавалі жыллё. З дапамогай банкаўскіх крэдытаў у бягучым годзе 52 сям’і газіфікавалі свае домаўладанні.
Запатрабаваныя жыхарамі раёна і крэдыты на спажывецкія патрэбы. Па стане на 1 снежня бягучага года крэдытнымі сродкамі нашага банка карыстаецца кожны трэці жыхар раёна.
Пастаянна ўдасканальваецца інфраструктура для ўладальнікаў банкаўскіх пластыкавых картак: у горадзе ўстаноўлены 2 банкаматы, 5 інфакіёскаў, 91 тэрмінал на прадпрыемствах гандлю і сэрвісу. Уладальнікамі картак ААТ «Беларусбанк» ў раёне з’яўляюцца 10700 чалавек.
Сёння мы паспяхова рэалізуем зарплатныя праекты. Іх рэалізацыя выгадная не толькі прадпрыемствам, але і работнікам, якія разам з выкарыстаннем картак, як сродку плацяжоў, атрымліваюць магчымасці авердрафтнага крэдытавання, афармлення крэдытнай карткі на спецыяльных умовах.
Дарэчы, стаўка робіцца на тое, каб і надалей развіваць “бязлюдныя тэхналогіі”. Такія паслугі, як SMS-банкінг, М-банкінг, інтэрнет-банкінг, дазваляюць кліентам ажыццяўляць банкаўскія аперацыі седзячы дома за камп’ютарам або з дапамогай мабільнага тэлефона.
Для павелічэння долі безнаяўных разлікаў сярод уладальнікаў банкаўскіх картак нашы спецыялісты пастаянна праводзяць акцыі па папулярызацыі гэтага сучаснага і зручнага сродку разлікаў, інфармуюць насельніцтва.
Прыемна адзначыць, што многія жыхары Кіраўшчыны даверылі свае зберажэнні менавіта нашаму банку. Людзі разумеюць, што грошы не павінны ляжаць у скарбонках. Калі сродкі знаходзяцца на банкаўскім рахунку, яны працуюць на эканоміку і дзяржавы, і сям’і. Дарэчы, павышэнне фінансавай адукаванасці насельніцтва — адна з першачарговых задач спецыялістаў Цэнтра.
Акрамя фізічных асоб, ЦБП №709 аказвае паслугі юрыдычным асобам і індывідуальным прадпрымальнікам. Усяго 188 кліентаў, якія абслугоўваюцца па сістэме “Кліент-банк”.
Пра ролю нашага банка ў фінансаванні эканомікі раёна сведчыць тое, што мы знаходзімся на першых месцах па аб’ёме крэдытавання народнай гаспадаркі. Суб’екты гаспадарання атрымалі крэдыты на рэканструкцыю, будаўніцтва і тэхнічнае пераабсталяванне і іншае.
Трэба сказаць, што ўзаемаадносіны банка з кліентамі будуюцца на прынцыпах партнёрства і даверу з разлікам на доўгатэрміновае супрацоўніцтва. Галоўная наша задача — не толькі захаваць нашу кліенцкую базу, але і з кожным годам павялічваць яе.
Напярэдадні прафесійнага свята хацелася б выказаць словы ўдзячнасці за плённую работу ўсяму калектыву нашага ЦБП №709, а таксама падзякаваць нашым дарагім ветэранам і павіншаваць іх са святам.
Запісала
Людміла СЯМЁНАВА.

На здымку: галоўны спецыяліст аддзела рознічнага бізнэсу Алена Лізунова, спецыяліст І катэгорыі сектара карпаратыўнага бізнэсу Таццяна Марозава, намеснік дырэктара Таццяна Свірыдзенкава, дырэктар Алена Лявіцкая, галоўны спецыяліст сектара карпаратыўнага бізнэсу Алена Печань.

Добавить комментарий

Ваш адрес email не будет опубликован.