На службе законнасці і справядлівасці
У першую нядзелю снежня прафесійнае свята адзначаюць адвакаты, пракуроры, суддзі, следчыя, юрысконсульты. Важнасць гэтай прафесіі ў сучасным грамадстве складана пераацаніць, бо ад якасці работы юрыста напрамую залежыць законнасць, грамадскі правапарадак і стабільнасць. А яшчэ быць юрыстам — вялікі гонар і адказнасць, бо прафесія патрабуе аб’ектыўнасці, вытрымкі, справядлівасці і асабістай бездакорнасці.
Юрыдычная кансультацыя Кіраўскага раёна займаецца аказаннем паслуг насельніцтву, прадпрыемствам, арганізацыям, прадстаўляе інтарэсы кліентаў у грамадзянскіх і адміністрацыйных працэсах, абараняе іх правы ў крымінальных працэсах, аказвае кансультацыйную дапамогу і інш. Адвакаты юрыдычнай кансультацыі, а гэта Наталля Пішчык і Кацярына Ваганава, прымаюць удзел у судовых працэсах практычна па ўсёй Беларусі.
з 2001 года ўстанову ўзначальвае член Магілёўскай абласной калегіі адвакатаў Наталля Пішчык. Стаць юрыстам Наталля Генадзьеўна марыла яшчэ будучы школьніцай. І менавіта адвакатам — каб абараняць правы і інтарэсы грамадзян. Нават у падлеткавым узросце яна любіла “разрульваць” канфліктныя сітуацыі сярод сяброў, дапамагала ім знайсці выхад з няпростых жыццёвых лабірынтаў, ды так, каб усё было па справядлівасці.
Пасля школы дзяўчына паступіла ў Гарадоцкі тэхнікум на ад-дзяленне “правазнаўства”. Закончыўшы ўстанову, стала працаваць сакратаром судовага пасяджэння Кіраўскага раённага суда. Але спыняцца на дасягнутым яна не стала, вырашыла працягваць абучэнне далей. У 2001 г. без адрыву ад вытворчасці скончыла Беларускі інстытут правазнаўства.
Галоўнае для Наталлі Генадзьеўны — дапамагчы грамадзяніну абараніць свае правы і інтарэсы, падтрымаць у няпростай жыццёвай сітуацыі, даць шанц на выпраўленне.
Па словах адваката, кожны год работы прыбаўляе ёй прафесійнага вопыту, што дапамагае хутчэй спраўляцца з ускладзенымі абавязкамі. Яе прафесія ў прамым сэнсе стала справай яе жыцця, і Наталля Генадзьеўна ўдзячна лёсу, што не здрадзіла сваёй дзіцячай мары і стала адвакатам.
Галоўнымі рысамі гэтай прафесіі спецыяліст лічыць упартасць, уседлівасць, уважлівасць і ўменне ўстанаўліваць кантакт з людзьмі — без гэтага немагчыма дасягнуць пастаўленай мэты. Яна цэніць у людзях дабрыню, пачуццё справядлівасці і шчырасць, негатыўна ставіцца да няпэўнасці і хлусні.
Пра сваю работу Наталля Генадзьеўна можа гаварыць бясконца і цікава. Па бляску ў яе вачах бачна, што яна любіць справу, якой займаецца, адсюль, несумненна, і яе прафесійныя поспехі.
Юрыдычная дзейнасць не стаіць на месцы. Жыццё мяняецца, а значыць, і заканадаўства таксама. І юрыст не мае права адставаць ад гэтага руху наперад: павінен сачыць за змяненнямі ў заканадаўчай базе, арыентавацца ў ёй і ўмець прымяняць на практыцы.
Людміла СЯМЁНАВА.
Фота Максіма МІКЕШЫНА.