З выдатным настроем вярнуліся з чэмпіянату ўсходне-еўрапейскай занальнай асацыяцыі, які праходзіў у г.Брэсце, члены жаночай маладзёжнай зборнай Беларусі па валейболе, сярод якіх і наша зямлячка Веалета Бяляўская — зноў чарговая перамога!

У спаборніцтвах прымалі ўдзел 7 каманд: Расіі, Украіны, Польшчы, Беларусі, Латвіі, Літвы і Эстоніі. Нашы дзяўчаты прадэманстравалі выдатную фізічную падрыхтоўку, а яшчэ — згуртаванасць, узаемападтрымку і зладжанасць.

Летась беларускія спартсменкі яшчэ двойчы святкавалі перамогу: на Балтыйска-юнацкіх гульнях у г.Брандэнбургу (Германія) і на міжнародным турніры ў г.Екацерынбургу (Расія).

Трэба адзначыць, што выхаванка ДЮСШ Веалета Бяляўская ў мінулым годзе была залічана ў маладзёжную зборную рэспублікі. За гэты час у сваю скарбонку дзяўчына  дабавіла 3 залатыя медалі.

Спортам яна пачала займацца з ранняга дзяцінства: у многім гэтаму пасадзейнічала сям’я: яе тата Уладзімір Уладзіміравіч пасля заканчэння Мінскага інстытута фізкультуры працаваў трэнерам у ДЮСШ, мама Таццяна Іванаўна была ў саставе валейбольнай каманды-чэмпіёнкі раёна, а дзядуля Уладзімір Сцяпанавіч — майстар спорту СССР па веласпорце, увогуле ўсё сваё жыццё аддаў спорту, трэніраваў веласіпедыстаў. Дзяўчынка выхоўвалася сярод спартсменаў, пастаянна чула размовы пра поспехі землякоў, сама праяўляла цікаўнасць да таго, што адбывалася на спартыўных пляцоўках.

Пачынаючы з чацвёртага класа, Веалета сур’ёзна занялася спортам. Яе адказнасць, стараннасць, упартасць дапамаглі быць у ліку лепшых. І сёння  дзесяцікласніцай Веалетай Бяляўскай па праву ганарацца выкладчыкі і вучні гімназіі горада і, безумоўна, яе родныя.

Упэўнены, што мая выхаванка і надалей будзе здзіўляць сваіх землякоў шматлікімі перамогамі. А мы будзем хварэць за нашу Веалету!

Сяргей ЛАЗАКОВІЧ, трэнер ДЮСШ.