У Кіраўску каля памятнага знака ў гонар воінаў-кіраўчан, якія выконвалі інтэрнацыянальны абавязак пры ліквідацыі лакальных канфліктаў, адбыўся мітынг
Пад такой назвай у межах патрыятычнай акцыі “Абавязак” учора ў райцэнтры, па ўсталяваўшайся традыцыі, каля памятнага знака ў гонар воінаў–кіраўчан, якія выконвалі інтэрнацыянальны абавязак пры ліквідацыі лакальных канфліктаў, адбыўся ўрачыста–жалобны мітынг.
У ім прынялі ўдзел старшыня райвыканкама Аляксандр Бутараў, член Савета Рэспублікі Нацыянальнага сходу Рэспублікі Беларусь, галоўны ўрач райбальніцы Алена Круцько, члены раённага выканаўчага камітэта, воіны-інтэрнацыяналісты, прадстаўнікі грамадскіх аб’яднанняў, працоўных калектываў, моладзь.
…Гучыць Дзяржаўны гімн Рэспублікі Беларусь. Словы вядучых: “Афганістан, слёзы маці па сынах, смутак дзяўчын па не вярнуўшыхся да іх каханых, наша памяць і павага да воінаў-інтэрнацыяналістаў, меўшых дачыненне да той трагічнай афганскай вайны, якая вялася ў два разы даўжэй, чым Вялікая Айчынная вайна” — не пакінулі раўнадушнымі ніводнага прысутнага на мерапрыемстве: на іх тварах быў смутак, у іншых блішчэлі слёзы.
Да прысутных на мітынгу звярнуўся кіраўнік раёна Аляксандр Бутараў:
— Дзень памяці воінаў-інтэрнацыяналістаў — гэта журботная і ў той жа час гераічная дата, якая ўпісана асаблівай старонкай у гісторыю Рэспублікі Беларусь, летапіс Узброеных Сіл як сімвал вернасці ваеннай прысязе і салдацкаму абавязку.
27 гадоў назад закончылася першая буйная антытэрарыстычная аперацыя ў навейшай гісторыі, якая працягвалася 2238 дзён і начэй. 76 савецкіх ваеннаслужачых былі ўдастоены звання Героя Савецкага Саюза, 103 — узнагароджаны ордэнам Леніна, амаль 2 тысячы — ордэнам Чырвонага Сцяга, звыш 51 тысячы — ордэнам Чырвонай Зоркі.
Час аддаляе нас ад страшных падзей, якія адбываліся ў той далёкай усходняй краіне. Але памяць аб вайне па-ранейшаму болем адгукаецца ў сэрцах маці, бацькоў, удоў, дзяцей тых хлопцаў, якія вярталіся дамоў “грузам-200”.
У Афганістане праходзілі службу звыш 32 тысяч ураджэнцаў Беларусі, з іх 772 чалавекі загінулі ў час баявых дзеянняў, 734 вярнуліся інвалідамі.
Трагічныя падзеі не абышлі і кіраўскую зямлю: траім нашым героям-землякам не суджана было вярнуцца жывымі (іх фотаздымкі на працягу мітынгу трымалі ў руках юнакі).
Сёння, ва ўмовах новых выклікаў сучаснасці, наша дзяржава высока цэніць ролю воінаў-інтэрнацыяналістаў ва ўмацаванні згоды ў грамадстве, у выхаванні падрастаючага пакалення ў духу патрыятызму, стойкасці і беззапаветнага служэння Айчыне. З гонарам пранёсшы скрозь гады і выпрабаванні свой баявы сцяг, многія працягваюць дастойна працаваць дзеля дабрабыту Беларусі.
Усе мы ўдзячныя воінам-інтэрнацыяналістам за мужнасць і гераізм, праяўленыя ў Афганістане.
Затым старшыня раённай арганізацыі ГА “Беларускі Саюз ветэранаў вайны ў Афганістане” Юрый Сафронаў нагадаў, што кіраўчане ганарацца подзвігам землякоў, якія загінулі ў мірны час у розных кропках іншых краін, і ніколі іх не забудуць.
Начальнік адасобленай групы Кіраўскага раёна Бабруйскага аб’яднанага гарадскога ваеннага камісарыята, маёр Андрэй Гайдукевіч адзначыў, што нашы землякі, верныя прысязе, абаранялі інтарэсы сваёй Радзімы і аказвалі сяброўскую дапамогу суседняму народу, дастойна выконвалі воінскі абавязак. За мужнасць і гераізм 21 воін-інтэрнацыяналіст нашага раёна ўзнагароджаны ордэнамі і медалямі.
Вайна ва ўсіх яе праяўленнях нясе смерць, горыч і разбурэнні. Аб гэтым мы павінны помніць заўсёды і супрацьстаяць войнам у імя памяці загінуўшых, падкрэсліў Андрэй Гайдукевіч.
Затым юнакі пранікнёна зачыталі радкі з пісьмаў, якія родныя атрымлівалі з Афганістана: два — ад сыноў, а трэцяе ўтрымлівала ў сабе звесткі аб гібелі нашага земляка.
У памяць аб загінуўшых воінах у той далёкай краіне дзяўчынкі вынеслі запаленыя лампадкі.
У памяць аб ахвярах афганскай вайны да памятнага знака былі ўскладзены вянкі і кветкі. Першы кошык памяці з кветкамі — ад старшыні райвыканкама Аляксандра Бутарава і члена Савета Рэспублікі Нацыянальнага сходу Рэспублікі Беларусь, галоўнага ўрача райбальніцы Алены Круцько.
Пасля мітынгу, па традыцыі, група з ліку “афганцаў” і моладзі ўсклала вянкі і кветкі на магілы Пятра Петрусевіча і Віктара Шумілава ў Гарадцы, Аляксандра Ядлоўскага ў Жылічах. Каля магілы Аляксандра Ядлоўскага вучні мясцовай школы і навучэнцы сельгаскаледжа неслі Вахту памяці.
…Памяць аб тых, хто прайшоў дарогамі вайны, хто не вярнуўся ў родны дом, для каго абавязак і Айчына былі галоўнымі ў жыцці, застанецца часцінкай гонару за нашых землякоў. Яна заўсёды будзе жыць у сэрцах людзей, вершах і воінскіх песнях, мностве абеліскаў, нагадваючы аб трагедыі і мужнасці салдат.
Таццяна БАРАДЗІНА.
Если вы желаете заказать фото, размещенное на страницах газеты или сайта, обращайтесь в редакцию газеты “Кіравец” по телефонам 24-2-63, 24-5-69