Сярод калектываў фельчарска-акушэрскіх пунктаў пераможцам раённага спаборніцтва прызнаны калектыў Мышкавіцкага ФАПа
Сярод калектываў фельчарска-акушэрскіх пунктаў пераможцам прызнаны калектыў Мышкавіцкага ФАПа.
Загадчык Святлана Юркавец, у галіне аховы здароўя працуе 25 гадоў. За гэты час яна назапасіла не толькі багаты вопыт работы, але дзякуючы свайму высокаму прафесіяналізму заваявала павагу сярод калег і давер жыхароў, якія абслугоўваюцца на гэтым участку (у яго ўваходзіць 4 населеныя пункты, дзе пражывае 911 чалавек).
На амбулаторным прыёме ў мінулым годзе пабывалі 4667 сяльчан, неабходная медыцынская дапамога аказана 4645.
Два разы ў год работнікамі ФАПа праводзяцца падворныя абходы, падчас якіх у сяльчан вымяраецца артэрыяльны ціск, праводзіцца агляд на педыкулёз і заразныя скурныя захворванні, а таксама агляд на выяўленне бачных форм анкалагічных захворванняў.
На ўчастку рэгулярна праводзіцца санітарна-асветніцкая работа: гутаркі, індывідуальныя кансультацыі на актуальныя тэмы.
У раённым спаборніцтве сярод калектываў сельскіх урачэбных амбулаторый першае месца прысуджана калектыву Жыліцкай амбулаторыі ўрача агульнай практыкі.
Паслугамі амбулаторыі карыстаюцца жыхары аг.Жылічы і 21 блізляжачай вёскі: агульная іх колькасць складае 2115 чалавек, у тым ліку 321 дзіця.
На працягу апошніх 23 гадоў прыём вядзе загадчык амбулаторыяй Андрэй Вервенка, чалавек адданы сваёй прафесіі. Да яго і медработнікаў установы звяртаюцца людзі, якія давяраюць ім сваё здароўе. Прафесіяналы сваёй справы заўсёды ўважліва выслухаюць хворага, паставяць дыягназ, падбадзёраць і ў абавязковым парадку прызначаць патрэбнае лячэнне. А для гэтага ў іх маецца самае неабходнае: важкі багаж ведаў і практычных навыкаў.
У мінулым годзе тут прынята 8042 пацыента, праведзена 2264 наведванні на даму, выканана 6016 медыцынскіх працэдур.
Адным са станоўчых фактараў у рабоце калектыву Жыліцкай амбулаторыі за 2015 год з’яўляецца зніжэнне ўзроўняў смяротнасці насельніцтва, пярвічнага выхаду на інваліднасць, захворваемасці.