Кіраўшчына, як і ўся Беларусь, адзначыла 71-ю гадавіну Перамогі ў Вялікай Айчыннай вайне. Мерапрыемствы, прымеркаваныя да гэтай даты, праходзілі ў раёне напярэдадні: адбыліся незабыўныя і хвалюючыя сустрэчы-гутаркі ветэранаў вайны з вучнямі школ і моладдзю, да іх з віншаваннямі і падарункамі наведаліся прадстаўнікі грамадскіх аб’яднанняў, працоўных калектываў. Да помнікаў, брацкіх магіл і абеліскаў былі ўскладзены вянкі і кветкі.
Дзень Перамогі быў напоўнены сонечным святлом, пяшчотнай веснавой цеплынёй, квеценню садоў і святочнай атмасферай.

Па традыцыі, у райцэнтры 9 Мая каля брацкай магілы воінаў і партызан, загінуўшых у гады Вялікай Айчыннай вайны, па вул.Гагарына сабраліся ветэраны вайны, воіны-інтэрнацыяналісты, прадстаўнікі раённай улады, працоўных і вучнёўскіх калектываў, раённых арганізацый грамадскіх аб’яднанняў і госці нашага горада.
Ва ўрачыстасцях прыняла ўдзел член Савета Рэспублікі Нацыянальнага сходу Рэспублікі Беларусь, галоўны ўрач райбальніцы Алена Круцько.
На грудзях удзельнікаў святочных падзей, аб’яднаных адзіным патрыятычным настроем, ззялі чырвона-зялёныя стужкі з яблыневымі кветкамі, якія ў нашай краіне ў межах рэспубліканскага праекта “Кветкі Вялікай Перамогі” сталі сімвалам Перамогі.
Ганаровае месца на ўрачыстым мітынгу-рэквіеме “Мір на зямлі вашым подзвігам створаны” было адведзена, вядома ж, ветэранам.

Да сабраўшыхся звярнуўся старшыня райвыканкама Аляксандр Бутараў. Ён адзначыў, што Дзень Перамогі — самае дарагое свята для кожнага з нас. Беларускі народ, як ніхто іншы, ведае цану міру і вышэй за ўсё ставіць гонар і свабоду сваёй Айчыны, захоўвае ў сэрцах не толькі мужнасць, гераізм, адвагу воінаў і працаўнікоў тылу, але і горыч страт ваеннага ліхалецця.
На Кіраўшчыне гітлераўцы правялі дзесяткі карных аперацый супраць партызан і мірных жыхароў. Самая масавая з іх — трагедыя в.Боркі, дзе былі закатаваны і спалены жывымі 1800 мірных жыхароў. Менавіта таму кожны жыхар раёна свята шануе памяць аб загінуўшых, даражыць мірам і свабодай, з павагай ставіцца да тых, хто набліжаў светлы Дзень Перамогі.
Пакаленне людзей, якое прайшло ўсе кругі ваеннага пекла, здзейсніла яшчэ адзін подзвіг — знайшло ў сабе сілы і адрадзіла родную Айчыну, адзначыў кіраўнік раёна.
Аляксандр Бутараў павіншаваў ветэранаў Вялікай Айчыннай вайны з Днём Перамогі, пажадаў ім як мага надалей заставацца ў страі і служыць для маладога пакалення прыкладам мужнасці і стойкасці.
8 мая ў нашай краіне адзначаўся Дзень Дзяржаўнага герба і Дзяржаўнага флага Рэспублікі Беларусь. Віншуючы жыхароў Кіраўшчыны з гэтым святам, Аляксандр Бутараў пажадаў, каб галоўныя сімвалы краіны, як найвялікшыя нацыянальныя каштоўнасці, для кожнага былі стымулам для новых працоўных перамог, здзяйсненняў і імкненнем да пастаяннага развіцця.
Ад імя франтавікоў, удзельнікаў Вялікай Айчыннай вайны горача і сардэчна павіншавала прысутных са святам Перамогі ветэран вайны Галіна Васільеўна Каранкевіч. Яна заклікала заўсёды помніць аб загінуўшых, беражліва адносіцца да тых, хто падарыў чалавецтву вясну 1945-га года. “На жаль, і сёння не ўсюды на нашай планеце спакойна. Таму давайце будзем даражыць гэтай цішынёй, берагчы яе і ніколі не забываць тых, хто аддаў сваё жыццё за мір і свабоду на зямлі”, — падкрэсліла ветэран.
“Мы павінны зрабіць усё магчымае, каб наш народ больш ніколі не зведаў жахлівых падзей той страшнай вайны, — з такімі словамі ад імя маладога пакалення звярнулася да ўдзельнікаў мітынгу-рэквіему вучаніца 11 класа СШ №1 Яўгенія Касцючэнка. — Дзень Перамогі — свята, якое ніколі не стане проста сімвалам або каляндарнай датай. Мы, маладое пакаленне, разумеем, што няма нічога на свеце даражэй, чым мірнае неба над галавой і свабодная краіна. Мы схіляем галовы перад ветэранамі і кажам ім: “Дзякуй! Дзякуй, што выстаялі! Дзякуй, што перамаглі!”.
Вучні школ раёна ў знак удзячнасці падарылі ветэранам майскія кветкі.
Да брацкай магілы, як сімвал непагаснасці памяці пакаленняў, былі паднесены запаленыя лампадкі.
Адлік метранома зноў сціснуў сэрцы. Мінута маўчання… У гэты момант на тварах ветэранаў — смутак, а на вачах — слёзы. Яны, напэўна, перанесліся ў думках у тыя страшныя ваенныя гады, успомнілі сваіх баявых таварышаў, тых, каму, на жаль, не давялося дачакацца Перамогі.
Да брацкай магілы былі ўскладзены вянкі, кошыкі памяці і кветкі. Першы кошык памяці — ад старшыні райвыканкама Аляксандра Бутарава і старшыні раённага Савета дэпутатаў Галіны Слабоднікавай.
Па завяршэнні мітынгу-рэквіему дзеці выпусцілі ў неба белых галубоў — сімвал міру, спакою і светлых надзей.
…Святочная калона, нібы плынь, якая звязвае мінулае і сучаснасць, у суправаджэнні духавога аркестра плаўна рушыла па вуліцы Кірава. На чале калоны — воіны тэрміновай службы са сцягам Перамогі, далей — эскорт машын з галоўнымі героямі святочных мерапрыемстваў — ветэранамі Вялікай Айчыннай вайны.
Галоўная плошча горада ператварылася ў вялікую канцэртную пляцоўку. Да ўвагі ўдзельнікаў свята — тэатралізаваны канцэрт — “Вайны свяшчэнныя старонкі навечна ў памяці людской!”

На плошчы горада пад адкрытым небам была наладжана работа тэатралізаваных пляцовак “Сцяна памяці”, якія былі падрыхтаваны з удзелам прадстаўнікоў калектываў, арганізацый і ўстаноў горада. Іх афармленне давала магчымасць акунуцца ў атмасферу франтавога быту, суровых ваенных выпрабаванняў: “Самы першы дзень вайны”, “Усё для фронта — усё для Перамогі!”, “Блакада Ленінграда”, “Ніхто не забыты, нішто не забыта. Спаленыя вёскі”, “Канвеер смерці” і іншыя. Зацікаўленасць выклікала пляцоўка “Вялікі Май — Пераможны Май!”, дзе быў усталяваны імправізаваны рэйхстаг з развіва-ючымся чырвоным сцягам.
У вайсковай палатцы працаваў кінатэатр “Перамога”, дзе быў наладжаны прагляд дакументальнай кінахронікі і мастацкіх фільмаў аб Вялікай Айчыннай вайне.
Усе жадаючыя мелі магчымасць пакаштаваць сапраўднай салдацкай кашы з палявой кухні.
… Гучаць фанфары “Дзень Перамогі”, па акрузе разносіцца хвалюючы голас: “Перамога! Як доўга ішла да яе наша краіна. Колькі было перажыта на гэтым шляху. Але савецкі народ адстаяў сваю Радзіму. І ўсё дзеля жыцця на зямлі, дзеля Перамогі!”…
І вось ужо на сцэне эпізод пачатку Вялікай Айчыннай вайны. Гучыць паведамленне савецкага ўрада, што 22 чэрвеня 1941 года ў чатыры гадзіны раніцы без усялякага аб’яўлення вайны германскія ўзброеныя сілы атакавалі межы Савецкага Саюза…
Змяняючы адзін аднаго, на сцэне — трагічныя моманты вайны: гора і слёзы матуль, гераізм і мужнасць савецкіх салдат.
Святочная тэатралізаваная праграма знайшла жывы водгук у сэрцы кожнага гледача, нікога не пакінула раўнадушным, у многіх на вачах блішчэлі слёзы.
У знак павагі і шчырай удзячнасці ветэранам былі ўручаны кветкі і памятныя сувеніры. Асаблівыя словы віншаванняў прагучалі ў адрас ветэрана вайны Галіны Васільеўны Каранкевіч, якая 8 мая адзначыла свой 85-гадовы юбілей, падарунак ёй уручыў старшыня райвыканкама Аляксандр Бутараў.
Дружным строем па плошчы прайшлі будучыя салдаты — прызыўнікі-2016. У іх адрас прагучаў наказ быць дастойнымі прадаўжальнікамі традыцый абаронцаў Айчыны і з гонарам несці імя воіна-салдата.
Пад гукі фінальнай песні “Дзень Перамогі” ў неба ўзмылі рознакаляровыя паветраныя шары, якія сімвалізавалі мір на нашай зямлі.
Для аматараў здаровага ладу жыцця на гарадскім стадыёне былі наладжаны спартыўныя мерапрыемствы.
Звонкі дзіцячы смех і радасныя воклічы чуліся ў гарадскім парку: тут для рабят быў наладжаны адпачынак.
Увечары кіраўчан і гасцей горада чакаў святочны канцэрт у гонар Вялікай Перамогі.

Фота у тэме https://www.kirovsk.by/2016/05/den-pobedy-na-kirovshhine/
Людміла СЯМЁНАВА.