Унучка Якуба Коласа на Кіраўшчыне
У чарговы раз малодшая ўнучка народнага паэта Беларусі Якуба Коласа, дачка яго старэйшага сына Данілы Канстанцінавіча В.Д.Міцкевіч пабывала на Кіраўшчыне, а дакладней, адпачывала ў санаторыі імя К.П.Арлоўскага. Кожны раз, знаходзячыся ў нашым раёне, жанчына праводзіць сустрэчы з кіраўчанамі і адпачываючымі, расказвае аб цікавым і насычаным на яркія падзеі жыцці вядомага беларускага песняра, аб яго дзецях і ўнуках, аб тым, як склаўся жыццёвы лёс кожнага з іх.
Вера Данілаўна, супрацоўнік Нацыянальнай бібліятэкі Беларусі, займаецца даследаваннем дзейнасці свайго дзеда. Шмат часу жанчына праводзіць у архівах, сустракаецца з людзьмі, якія былі знаёмыя з Якубам Коласам, запісвае іх успаміны. Дзённікі, запісныя кніжкі, рукапісы, тэатральныя праграмкі, пісьмы, фотакарткі — усё гэта сведчыць аб што-дзённай дзейнасці паэта, адкрываючы невядомыя да гэтага часу старонкі яго жыцця. Дарэчы, радаслоўе Якуба Коласа сёння налічвае звыш 380 чалавек — браты, сёстры, пляменнікі, унукі, праўнукі.
У бягучым годзе вый-шла з друку новая кніга з серыі “100 выдатных дзеячаў беларускай культуры” — аб людзях, якія ўнеслі значны ўклад у нашу беларускую гісторыю і культуру. Матэрыял аб жыцці і дзейнасці Якуба Коласа для выдання падрыхтавала яго ўнучка В.Д.Міцкевіч.
Чытаючы гэтую кнігу, дзіву даешся, як можна на 62 старонках расказаць аб такім вядомым чалавеку!? Вера Данілаўна пастаралася знайсці новыя цікавыя факты з жыцця свайго дзеда, расказаць, адкуль Якуб Колас узяў свой псеўданім, як яму жылося і працавалася ў цяжкія 20-30-я гады…
З унучкай беларускага песняра давялося сустрэцца ў дзень яе ад’езду з санаторыя. Жанчына не пераставала пералічваць усе тыя змены, якія адбыліся за два апошнія гады пасля яе наведвання на Кіраўшчыну: вельмі папрыгажэў горад, сталі больш утульнымі пакоі для адпачываючых у санаторыі, павялічана колькасць лячэбных працэдур, ажыццяўляюцца экскурсійныя паездкі. А які ветлівы тут персанал!
Вера Данілаўна адзначыла, што абавязкова зноў прыедзе сюды на адпачынак.
Таццяна БАРАДЗІНА.
На здымку: В.Д.Міцкевіч (справа) гутарыць з дырэктарам санаторыя імя К.П.Арлоўскага В.У.Гаршковай.