Рэпетыцыя перад жнівом на Кіраўшчыне

dob2 _MG_9527dob

Здаецца, што да пачатку ўборачнай кампаніі — самага сур’ёзнага экзамена для хлебаробаў яшчэ дастаткова часу, аднак надвор’е, а з ім і больш хуткія тэрміны паспявання сельскагаспадарчых культур, у ліку якіх і рапс, дыктуюць свае правілы. 

Сельгасарганізацыі раёна актыўнымі тэмпамі ўзяліся за ўборку алейнай культуры. У бягучым годзе азімы рапс размясціўся на 917 га. Па стане на 14 ліпеня на 699 га ён ужо ўбраны, намалочана 1057 т пры сярэдняй ураджайнасці 15 ц/га. У ліку лідараў па намалотах з 1 га плошчаў ААТ “Кіраўскае райаграпрамтэхзабеспячэнне” — 23 ц і СВК “Калгас “Ніва” — 19 ц.

На бягучым тыдні да ўборкі рапсу прыступілі працаўнікі ААТ “Дабаснянскае”. У гаспадарцы гэтая культура размясцілася на плошчы ў 108 га, такая тэрыторыя засталася пасля неспрыяльных умоў надвор’я, з-за якіх амаль палову пасеваў давялося перасяваць яравым рапсам.
Як адзначыў галоўны аграном таварыства Андрэй Голубеў, рапс выйшаў з зімы моцным і хутка пайшоў у рост, пасевы радавалі вока прыгожай зелянінай. Аднак, адсутнасць вільгаці вясною і на пачатку лета не лепшым чынам адбілася на фарміраванні раслін і, як вынік, стручкі і зярняткі дробныя.
Пачалі жніво выбарачным шляхам. Справа ў тым, што паспяванне рапсу ідзе нераўнамерна: на ўзгорках, дзе рост запавольваўся, зерне яшчэ не паспела і ўборка там будзе весціся пазней.
Першыя зжатыя ўчасткі не далі багатага ўраджаю: з кожнага гектара тут у сярэднім намалацілі каля 10 ц алейнай культуры. Бясспрэчна, што гэта нямнога, але калі выразіць у грашовым эквіваленце, то пры рэалізацыі атрымаецца практычна столькі ж, колькі б даў ураджай з гектара збожжавых.

Як адзначыў галоўны аграном, адметнасць уборкі рапсу ў тым, што працаваць даводзіцца з самага ранку і ўвечары, каб пазбегнуць залішняга раскрыцця стручкоў, страты ўраджаю. Дапамагаюць у гэтым і навейшыя тэхналогіі, такія, як апрацоўка пасеваў рапсу спецыяльнымі прэпаратамі, якія “склейваюць” створкі.
На палетках зараз працуюць два камбайны, гэтай тэхнікі пакуль дастаткова. Кіруюць імі сямейныя экіпажы ў саставе бацькі і сына Міхаіла і Аляксандра Галомзікаў, Юрыя і Яўгена Бычковых. На адвозцы задзейнічаны Мікалай Асташоў. На сваім аўтамабілі ён хутка дастаўляе зерне на ачышчальна-сушыльную гаспадарку. Там яго чысцяць ад прымесяў і дапрацоўваюць да неабходнай вільготнасці.
Што тычыцца працаўнікоў, занятых на ўборачных работах, то яны не падвядуць, упэўнены Андрэй Голубеў: кадры падабраны надзейныя і, як гаворыцца, правераныя. Гэта і тыя, у каго за плячыма ўжо шмат уборачных кампаній, і тыя, хто толькі пачынае адлік свайго хлебаробскага “стажу”.
Паралельна з абмалотам рапсу вядзецца ўборка насеннікаў шматгадовых траў. Кіраўніцтва таварыства пераканана, што лепш атрымаць сваё насенне, чым потым купляць яго за немалыя грошы. Амаль палову з адведзеных 65 га траў ужо ўбралі. На гэтых работах занятыя механізатары Іван Зубаў, Аляксандр Міхлюк, Уладзімір Скрыганаў.
Жніво ў гаспадарцы сустрэлі ў поўнай баявой гатоўнасці. Па-магчымасці давялі да ладу тэхніку, на завяршальнай стадыі падрыхтоўка сушыльнай гаспадаркі да прыёму свежага збожжа, якое даспявае на сотнях гектараў. З удзельнікамі ўборачнай быў праведзены інструктаж па тэхніцы бяспекі, даведзены да ведама рабочыя нормы, расцэнкі.
Людміла СЯМЁНАВА.

Добавить комментарий

Ваш адрес email не будет опубликован.