Каб зімоўка жывёлы на Кіраўшчыне была сытнай

_MG_3317
_MG_32952

З ранняй вясны да позняй восені не бывае палёгкі для механізатараў — адна работа змяняе другую. Няма выключэнняў з гэтага правіла і для працаўнікоў СВК “Калгас “Ніва”. Здаецца, толькі што адзвінела жніво, якое, дарэчы, прайшло ў гаспадарцы зладжана, без збояў, а думкі земляробаў ужо былі накіраваны на правядзенне іншых сельгасработ з захаваннем агратэхнічных патрабаванняў. 

Ніваўцы актыўна ўключыліся ў нарыхтоўку кармоў для грамадскага статка, бо ведаюць, што ад адказнасці і добрасумленнасці кожнага з іх залежыць вытворчасць малака і мяса. А гэта, у сваю чаргу, дае магчымасць пастаянна атрымліваць грашовыя сродкі на разліковы рахунак.
Каб забяспечыць сытную зімоўку пагалоўю, а ў сельгасарганізацыі налічваецца 4116 галоў (у т.л. 1255 кароў), якія ўтрымліваюцца на 5 фермах, неабходна мець якасныя кармы пад поў- ную патрэбу. З траў першага ўкосу ў гаспадарцы назапашана 318 т сена, звыш 10 тыс. т сенажу. У гэтыя дні актыўнымі тэмпамі ўбіраецца кукуруза на сілас. На гэтыя мэты адведзена плошча ў 800 га і яшчэ 200 — на зерне. Сярэдняя ўраджайнасць “каралевы палёў” складае 268 ц/га.
Учора журналісты “раёнкі” пабывалі ў гаспадарцы. За в.Ізабеліна на КЗР-10 кукурузу здрабняў Алег Стальмакоў, які працуе ў СВК “Калгас “Ніва” на працягу амаль двух дзесяцігоддзяў. За дзень ён убірае “каралеву палёў” на плошчы ў 20 га. Па словах вопытнага механізатара, сёлета пасевы кукурузы выглядаюць лепш, чым летась, а гэта ўжо радуе.
Адвозіў масу на закладку ў сянажную траншэю, якая размешчана каля МТФ в.Ізабеліна, вадзіцель Юрый Лютарэвіч. І не было выпадку, каб з-за яго былі прастоі тэхнікі, ён заўсёды ставіцца да выканання даручанай справы з адказнасцю. А расслабляцца працаўнікам гаспадаркі няма калі, бо на працягу 2-3 дзён патрэбна запоўніць траншэю. Затым — наступную.
Непадалёку ад гэтага поля на КВК-800 працаваў Міхаіл Рымараў: ён здрабняў рапсавую салому на сілас. Механізатара ў калектыве СВК “Калгас “Ніва” цэняць не толькі як кваліфікаванага спецыяліста, але і як спагадлівага чалавека, які заўсёды прыйдзе на дапамогу.

Як адзначыў старшыня праўлення Іван Рыняк, ужо назапашана 3157 т к.адз., што складае па 10,6 ц к.адз. на ўмоўную галаву жывёлы, а ўсяго мяркуецца мець па 28 ц. Пры нармальным ходзе работ тут плануюць забяспечыць 1,5-гадавы запас кармоў. Кіраўніцтва, спецыялісты і радавыя працаўнікі задаволены тым, што сёлета пасевы сельгаскультур больш ураджайныя, таму, спадзяюцца, і рацыён пагалоўя будзе паўнацэнным і збалансаваным.
З адказнасцю падыходзяць механізатары і да падрыхтоўкі глебы пад сяўбу культур ураджаю-2017. Усе занятыя на гэтых работах разумеюць, што менавіта сёлетняй восенню будзе закладзены трывалы падмурак пад важкія намалоты і высокія ўраджаі.
Не марудзячы з тэмпамі, у сельгасарганізацыі распачалі і азімую сяўбу: рапс пасеяны на плошчы 340 га (100%), прыступаюць да сяўбы свірэпіцы, якая размесціцца на плошчы 135 га. Старшыня гаспадаркі ўпэўнены, што завершаць яе ў аптымальныя тэрміны.
Паралельна з іншымі работамі вядзецца ўборка саломы з палёў: яна запрасавана на плошчы 1720 га, а звезена — з 1240. Пад сяўбу азімых культур на палеткі вывезена 3500 т арганічных угнаенняў, пад цукровыя буракі — 2000 т.
Па словах Івана Рыняка, усе сельгасработы праводзяцца ў аптымальныя тэрміны, тэхніка не падводзіць. І ўсё гэта дзякуючы стараннай працы вопытных, зарэкамендаваўшых сябе поспехамі і дасягненнямі земляробаў.
Таццяна БАРАДЗІНА.
Фота
Максіма МІКЕШЫНА.

 

Добавить комментарий

Ваш адрес email не будет опубликован.