Каб было цёпла ў спажыўцоў

IMG_5173З выдатным настроем сустракае сваё прафесійнае свята калектыў філіяла “Кіраўскі райпаліўзбыт” МАУВП “Аблпаліва”,  пераможца штогадовага абласнога спаборніцтва сярод аднатыпных арганізацый у галінах транспарту, сувязі і сферы абслугоўвання за 2015 год. Узятыя тэмпы ён не зніжае і сёлета: у параўнанні з адпаведным перыядам мінулага года насельніцтву рэалізавана на 150 м3 дроў больш.

Як адзначыў дырэктар Рыгор Дайнека, іх дружнаму і зладжанаму калектыву з 9 чалавек па сіле выкананне вытворчай праграмы, нарошчванне аб’ёмаў рэалізацыі паліва, своечасовае забеспячэнне спажыўцоў торфабрыкетам і дровамі. Выручка ад рэалізацыі за 7 месяцаў бягучага года склала 123 тыс. рублёў, а чысты прыбытак — 2 тыс.
Сёлета спажыўцам прададзена амаль 550 т торфабрыкету, які пастаўляюць ААТ “Торфапрадпрыемства Дняпроўскае” і “Старобінскі торфабрыкетны завод”. Таксама прададзена 1177,8 м3 дроў. Львіную іх долю — 774,8 м3 паставіў ДЛГУ “Клічаўскі лясгас”. Супрацоўнічае філіял таксама з Быхаўскім і Бабруйскім лясгасамі. Дарэчы, у апошні час значна палепшаны якасны састаў дроў: 80% складаюць бяроза і алешына.
Старанна і адказна працуюць трактарысты Васіль Багданаў і Уладзімір Бяляўскі, якія абслугоўваюць чатыры адзінкі тэхнікі: дастаўляюць драўніну з лясніцтваў на базу, загружаюць паліва на транспарт, а таксама развозяць яго па адрасах спажыўцоў па ўсім раёне. На раскрыжоўцы драўніны бензапілой “Штиль” шчыруе Аляксандр Юхнавец, затым у залежнасці ад заявак на спецыяльным станку чурбаны колюцца.
Значная ўвага надаецца забеспячэнню палівам грамадзян ільготнай катэгорыі. З пачатку года ім прададзена 135 т торфабрыкету і 234 м3 дроў.
Члены калектыву разумеюць, што ад іх дзейнасці залежыць бесперабойная работа ўстаноў і арганізацый, камфортнае жыццё грамадзян. Таму да выканання ўскладзеных абавязкаў ставяцца з адказнасцю, да кожнага кліента — з увагай і разуменнем. За што і чуюць у свой адрас толькі словы падзякі.
Дарэчы, падчас наведвання прадпрыемства да журналістаў “раёнкі” падышоў кіраўчанін П.З.Свірко і пачаў расказваць, як на працягу многіх гадоў ён карыстаецца паслугамі работнікаў райпаліўзбыту, як задаволены абслугоўваннем і якасцю дастаўляемага яму паліва. “У доўгія зімовыя вечары цёпла не толькі ў доме, але і радасна на душы ад таго, што ёсць такі згуртаваны калектыў, які працуе для людзей, выконваючы іх заказы своечасова,— зазначыў удзячны кліент.
Таццяна БАРАДЗІНА.

Добавить комментарий

Ваш адрес email не будет опубликован.