Запасы папаўняе кукуруза
У раёне працягваецца нарыхтоўка кармоў для грамадскага статка. Згодна інфармацыі райсельгасхарчу па стане на 22 верасня ў гаспадарках убрана кукуруза на плошчы 4515 га, з яе закладзена 139062 т сіласу.
Актыўнымі тэмпамі вядуцца работы па нарыхтоўцы сіласу ў СВК “Бераснёўскі” ААТ “Упраўляючая кампанія холдынга “Бабруйскаграмаш”. На ўчарашнюю раніцу “каралева палёў” тут ужо была ўбрана на 350 га. А ўвогуле, сёлета яна займае плошчу ў 450 га, з якіх 100 га кукурузы будзе абмалочана на зерне. Здрабняюць расліны 3 кормаўборачныя камбайны, на адвозцы задзейнічаны 3 ПІМы і адзін МАЗ, на трамбоўцы — дзве адзінкі тэхнікі.
У аўторак, калі карэспандэнты “раёнкі” наведаліся ў сельгасарганізацыю, корманарыхтоўчыя работы вяліся на полі за в.Віленка, непадалёк закладвалася і сіласная траншэя. На здрабненні зялёнай масы на КВК-800 быў заняты адзін з самых вопытных і адказных працаўнікоў гаспадаркі Алег Грынфельд. Яго кормаўборачны камбайн рухаўся без перапынку: тэхніка, занятая на адвозцы, хутка дастаўляла масу ў траншэю і зноў станавілася пад загрузку. На ўборцы кукурузы таксама працуюць Павел Шапоткін і Антон Трушкін. Як адзначыў Алег Грынфельд, удзел у сёлетняй корманарыхтоўчай кампаніі прыносіць сапраўднае задавальненне: кукуруза на палетках стаіць густой сцяной, вабяць вока расліны пад два метры ў вышыню. Сёлетняе сонечнае лета было на карысць гэтай культуры, таму і вырасла яна на славу.
Убіраць такі ўраджай механізатарам у радасць. І сапраўды, літаральна праз некалькі дзясяткаў метраў руху КВК-800 кузавы і прычэпы сельгастэхнікі напаўняліся духмянай травяной масай.
Хутка дастаўляюць здрабнёную кукурузу ў сіласную яму браты Вадзім і Віталь Лугаўцовы, Яўген Міхалап і Уладзімір Карасёў. На траншэі ўся маса хутка разраўніваецца і трамбуецца. Ні на хвіліну не змаўкае гул трактароў К-700 і “Амкадора”, за рулём якіх знаходзяцца Сяргей Навакшонаў і Павел Іваноў. За ходам работ назіраюць адказныя спецыялісты, яны ж ажыццяўляюць кантроль за вільготнасцю і тэмпературай закладваемай масы, правяраюць даўжыню рэзкі кукурузы, якія таксама ўплываюць на якасць кармоў. У сілас дабаўляюць здробненую салому, якая ўтрымлівае карысную для жывёлы клятчатку. Часта пад’язжае да сіласнай ямы дырэктар сельгаскааператыва Віктар Мамурын, каб пракантраляваць ход работ.
Каменціруючы корманарыхтоўчую кампанію ў гаспадарцы, Віктар Віктаравіч адзначыў, што сёлета калектыў “Бераснёўскага” прадпрымае ўсе магчымыя захады, каб увайсці ў зімоўку з дастатковай колькасцю кармоў, якія пры гэтым будуць высокаякаснымі і збалансаванымі. А перадумовы для гэтага ёсць. Пры плане нарыхтоўкі сіласу ў 9200 т бераснёўцы ўжо назапасілі больш за 8400 т (напрыклад, у мінулым годзе ўсяго на зімоўку ўдалося закласці толькі 3600 т сіласнай масы). Больш чым на 1500 т у параўнанні з леташнім заклалі і сенажу.
Самым жа аб’ектыўным паказчыкам з’яўляецца колькасць кармавых адзінак. Бераснёўцы ўжо маюць па 21,1 ц.к.адз. травясністых кармоў на ўмоўную галаву жывёлы (+10,3 ц.к.адз. да адпаведнага перыяду мінулага года). Усяго ж у гаспадарцы налічваецца 2200 галоў БРЖ, з якіх 602 — каровы.
Старанныя механізатары, дарэмна не трацячы ніводнай хвіліны, клапоцяцца аб сытнай зімоўцы грамадскага статка. Застаецца спадзявацца, што трывалая кармавая база дазволіць бераснёўцам павысіць валавую вытворчасць малака, што, у сваю чаргу, палепшыць эканамічны стан гаспадаркі і дабрабыт яе працаўнікоў.
Людміла СЯМЁНАВА.
Фота аўтара.