У доме Таранавых у Барсуках заўсёды чуецца вясёлы смех і галасы, поўныя любові і радасці. Няма межаў шчасцю ў бацькоў, калі ўсе збіраюцца разам. Асаблівая пашана і павага ў гэтай вялікай сям’і – маці, якая выхавала і дала пуцёўку ў жыццё многім рабятам. Вольга Паўлаўна з’яўляецца прыёмнай маці з 2004 года. За гэты час яна разам з мужам Мікалаем Рыгоравічам, які, дарэчы, працуе трактарыстам у мясцовай гаспадарцы, выхавалі 6 дзяцей, якія пайшлі ў жыццё. З усімі падтрымліваюць цесную сувязь.
У Вольгі Паўлаўны і Мікалая Рыгоравіча двое дарослых родных дзяцей – дачка і сын, падрастаюць трое ўнукаў, малодшаму з якіх усяго тыдзень. Таксама ўзнімаюць настрой і надаюць ім сіл у жыцці удачароная Алёна і прыёмныя Улад і Дзіма. Таранавы не дзеляць дзяцей на “сваіх” і “чужых”: усе для іх – самыя дарагія сэрцу, і за ўсіх яно аднолькава баліць.
Дзеці Таранавых вучацца ў Паўлавіцкай СШ імя Р.А.Худалеева. Хлопцы не сядзяць без справы, яны самаразвіваюцца і адкрытыя ўсяму новаму. Улад займаецца ў спартыўных секцыях, рэгулярна ўдзельнічае і займае прызавыя месцы ў раённых і абласных спаборніцтвах. З апошніх дасягненняў – другое месца ў абласных спаборніцтвах па летняму мнагаборству і трэцяе месца па кулявой стральбе сярод юнакоў 8-11 класаў у праграме круглагадовай спартакіяды школьнікаў. Дзіма, па ўсёй бачнасці, — будучы праграміст: дасканала разбіраецца ў камп’ютары і мае добрую памяць, хутка завучвае вершы. Алёна — творчая дзяўчынка, захапляецца маляваннем і спевамі, актыўна ўдзельнічае ў школьных мерапрыемствах і грамадскім жыцці.
Вельмі важна, адзначае Вольга Паўлаўна, дапамагчы прыёмнаму дзіцяці пазбавіцца страху адзіноты і выхаваць у ім самастойнасць. Яна лічыць, што самае галоўнае ў выхаванні дзяцей — навучыць іх быць чалавечнымі і з павагай ставіцца да іншых людзей. І ў сваім сямейным жыцці яна кіруецца прынцыпамі ўзаемаразумення, цярпення і падтрымкі.
Настасся ЛОГВІНАВА.