Знайшла сваё прызнанне ў школе
За плячыма Алены Рыгораўны Гайдук — шматгадовая праца ў школе. Шырокая эрудыцыя, глыбокая ўнутраная культура, грунтоўнае веданне тэорыі і методыкі навучання матэматыкі даюць магчымасць настаўніку выкарыстоўваць адукацыйны і выхаваўчы патэнцыял кожнага ўрока. Яна настойліва і плённа працуе, імкнецца зацікавіць вучняў сваім прадметам.
Алена Рыгораўна адзначае, што вельмі важна падрыхтаваць вучняў да жыцця, каб юнакі і дзяўчаты былі людзьмі актыўнымі, творчымі, неабыя-кавымі.
У працоўным жыцці Алены Рыгораўны пачаўся 25-ы школьны верасень. Яна па-ранейшаму захоплена педагогікай, шчодра аддае свае веды і цяпло сэрца вучням. “Люблю дзяцей, бо з імі лёгка знайсці агульную мову, узаемаразуменне. Заўсёды імкнуся стварыць у класе атмасферу даверу і творчасці, наладзіць з вучнямі дыялог і супрацоўніцтва”, — падкрэслівае Алена Рыгораўна. Важна тое, што настаўнік умее “падабраць ключык” да дзіцячага сэрца, стварыць умовы для максімальнага выяўлення здольнасцей і таленту кожнага з рабят.
“Падабраць ключык” Алена Рыгораўна можа не толькі да дзяцей, але і да сваіх калег, з якімі яна працуе і з’яўляецца кіраўніком вучэбнай работы.
У школе А.Р.Гайдук паважаюць за яе адкрытасць, арыгінальнасць мыслення, добразычлівыя адносіны да кожнага члена калектыву. Ніколі не застаецца ў баку ад праблем калег, стараецца іх вырашыць, заўсёды прыходзіць на дапамогу, хто б да яе не звярнуўся, хвалюецца за агульную справу.
Добры настаўнік, граматны завуч. Але самае цудоўнае, што прафесійная дзейнасць паспяхова ажыццяўляецца жанчынай у сям’і, у якой выхоўваецца трое таленавітых дзяцей. Не раз яны абаранялі гонар нашай школы ў алім-піядах, конкурсах, спартыўных спаборніцтвах і з’яўляліся прызёрамі. Алена Рыгораўна зараз выхоўвае іх адна. Не так даўно пайшоў з жыцця муж і бацька. Але шчырая, сумленная, праўдзівая ў сваіх перакананнях і выказваннях, з добрым і чулым сэрцам жанчына не здаецца. І заўсёды побач яе дзеці і работа ў школе.
Святлана Рыняк, настаўнік
беларускай мовы і літаратуры Паўлавіцкай СШ імя Р.А.Худалеева.