Каб зноў шумелі лясы на Кіраўшчыне…
“Адновім лясы разам” — пад такой назвай у Беларусі з 8 па 31 кастрычніка праходзіла дабрачынная акцыя па пасадцы лесу на тэрыторыях, якія найбольш пацярпелі ад ліпеньскіх ураганаў.
Актыўны ўдзел у праводзімай акцыі прынялі работнікі Гарадзецкага лясніцтва. Так, у раёне в.Ахоцічы на плошчы 0,7 га высаджана 2900 сеянцаў сасны, якія былі прывезены з Брожскага гадавальніка. Значныя работы правялі работнікі лясніцтва па садзейнічанні натуральнаму ўзнаўленню лесу. Робіцца гэта для таго, каб захаваць увесь жыццяздольны падрастаючы маладняк гаспадарча-каштоўных парод дрэў. У сувязі з гэтым на плошчы ў 1,3 га праведзена мінералізацыя глебы.
Акрамя таго, у межах дабрачыннай акцыі “Адновім лясы разам” работнікі Гарадзецкага лясніцтва аказалі значную дапамогу па аднаўленні лясных угоддзяў работнікам Чэрвеньскага лясгаса, лясы якога найбольш пацярпелі ад ліпеньскіх ураганаў бягучага года: 14800 сеянцаў сасны кіраўчане высадзілі на плошчы 4 га.